‘സാരി കാൻസർ ‘എന്ന് കേട്ടിട്ടുണ്ടോ? യഥാർത്ഥത്തിൽ എന്താണ് സാരി ക്യാൻസർ? പേര് സൂചിപ്പിക്കുന്നതുപോലെ സാരി ധരിച്ചതുകൊണ്ട് ഉണ്ടാകുന്ന അർബുദമാണോ ഇത്. എന്നാൽ കേട്ടോളു, അരയ്ക്കു ചുറ്റും ഇറുകിയ വസ്ത്രങ്ങള്‍ ധരിക്കുന്നതുമൂലം ഉണ്ടാകുന്ന ആരോഗ്യപ്രശ്നങ്ങളെയാണ് സാരി ക്യാൻസർ എന്നതുകൊണ്ട് വിശേഷിപ്പിക്കപ്പെടുന്നത്. സ്ക്വാമസ് സെൽ കാർസിനോമ (എസ്‌സിസി) യെയാണ് സാരി കാൻസർ എന്ന് അറിയപ്പെടുന്നത്. അതായത് തുടർച്ചയായി ഇറുകിയ വസ്ത്രങ്ങള്‍ ധരിക്കുമ്പോള്‍ വീക്കമുണ്ടാകുകയും പിന്നീടത് ഗുരുതരമാകുകയും ചെയ്യുന്ന അവസ്ഥയാണിത്. സാരിയോ മുണ്ടോ മുറുക്കി ഉടുക്കുമ്പോഴും ജീൻസ് പതിവായി ധരിക്കുമ്പോഴും ഈ ആരോഗ്യാവസ്ത ഉണ്ടാകാം.
ദോത്തി കാന്‍സറിനൊപ്പം 1945ലാണ് ഈ പദം ആദ്യമായി ഉപയോഗിക്കപ്പെടുന്നത്. 2011ല്‍ ജേണല്‍ ഓഫ് ഇന്ത്യന്‍ മെഡിക്കല്‍ അസോസിയേഷനില്‍ ഇത്തരത്തില്‍ രണ്ട് കേസുകള്‍ റിപ്പോർട്ട് ചെയ്തിട്ടുണ്ട്. ദീർഘനേരം സാരി പോലുള്ള വസ്ത്രം വെയ്സ്റ്റ് ഡെർമറ്റോസിസ് ആവുകയും പിന്നീടത് ഗുരുതരമാവുകയും ചെയ്യും. തുടർന്ന് അർബുദത്തിലേക്ക് നയിക്കുകയും ചെയ്യാം. അരക്കെട്ടിനെ ബാധിക്കുന്ന ഈ അർബുദത്തെയാണ് സാരി കാൻസർ എന്ന് വിളിക്കുന്നത്. ചർമ്മത്തിന് പുറത്തെ സ്ക്വാമസ് കോശങ്ങളെയാണ് അർബുദം ബാധിക്കുക. അമിത സൂര്യപ്രകാശമേൽക്കുന്ന ശരീരഭാഗങ്ങളിലും സാരി കാൻസർ ഉണ്ടാവാൻ സാധ്യതയുണ്ട്.
അരക്കെട്ട് അർബുദത്തിന്റെ ലക്ഷണങ്ങള്‍
- ചുവന്ന പാടുകള്‍
- വ്രണങ്ങള്‍
- അരക്കെട്ടിനു സമീപമുണ്ടാകുന്ന മുഴകള്‍
പേര് സാരി കാൻസർ എന്നാണെങ്കിലും സാരിയല്ല ഇവിടുത്തെ വില്ലനെന്നാണ് വിദഗ്ധർ പറയുന്നത്. അരക്കെട്ടിൽ ഇറുക്കിക്കെട്ടുന്ന അടിപ്പാവാടയാണ് പ്രധാന പ്രശ്നം. ഇറുകിയ പെറ്റിക്കോട്ട്, മുണ്ടുകൾ, ജീൻസ് തുടങ്ങിയവയും അർബുദത്തിന് കാരണമായേക്കാം. ഇത് ചർമ്മത്തില്‍ ഉരഞ്ഞ് മുറിവുകളുണ്ടാക്കുകയാണ് ചെയ്യുന്നത്. അതിനാൽ തന്നെ ഇവ ധരിക്കുമ്പോൾ ചർമത്തെ ബാധിക്കും വിധം ഇറുകിക്കിടക്കുന്നില്ലെന്ന് ഉറപ്പുവരുത്തേണ്ടത് പ്രധാനമാണ്.
