പഴയ ഇരിപ്പിടം തിരിച്ചുപിടിക്കുമെന്ന് ഉറപ്പിച്ച് ദിലീപ്; ‘ഭ ഭ ബ’ ഉച്ചവരെ കളക്ഷൻ 81 ലക്ഷം
മലയാളി സമൂഹം ഉറ്റുനോക്കിയ നിയമപോരാട്ടത്തിനൊടുവിൽ കോടതിയുടെ ക്ലീൻചിറ്റുമായി എത്തിയ നടൻ ദിലീപ്നെ പ്രേക്ഷകർ എങ്ങനെ സ്വീകരിക്കും എന്ന ചോദ്യത്തിനാണ് ഇപ്പോൾ ഉത്തരം രൂപപ്പെടുന്നത്.
ദിലീപ് നായകനായ ‘ഭ ഭ ബ’ ബോക്സ് ഓഫീസിൽ മികച്ച തുടക്കമാണ് രേഖപ്പെടുത്തിയിരിക്കുന്നത്.
ബോക്സ് ഓഫീസ് ട്രാക്കറായ Sacnilk റിപ്പോർട്ട് പ്രകാരം, ചിത്രം ആദ്യദിനം ഉച്ചവരെ ഏകദേശം 81 ലക്ഷം രൂപയുടെ കളക്ഷൻ സ്വന്തമാക്കി. ഇന്നത്തെ മൊത്തം കളക്ഷൻ ഒരു കോടി രൂപ കടക്കുമെന്നാണ് വിലയിരുത്തൽ.
അഡ്വാൻസ് ബുക്കിങ്ങിൽ തന്നെ ‘ഭ ഭ ബ’ റെക്കോർഡിട്ടിരുന്നു. ബുക്ക് മൈ ഷോ വഴി മണിക്കൂറിൽ പതിനായിരത്തിലധികം ടിക്കറ്റുകളാണ് വിറ്റുപോയത്. ആദ്യദിനം മാത്രം ഏകദേശം ഒരു കോടി രൂപയുടെ പ്രീസെയിൽ ബിസിനസാണ് ചിത്രം നേടിയത്.
ഈ വർഷത്തെ ആദ്യ ക്രിസ്മസ് റിലീസ് ആയ ചിത്രത്തിന്, മറ്റു വലിയ റിലീസുകൾ ഇല്ലാത്തതിനാൽ, കൂടുതൽ തിയേറ്ററുകളും ലഭിച്ചു.
നടി ആക്രമിക്കപ്പെട്ട കേസിൽ അറസ്റ്റിലായതിന് ശേഷം ജാമ്യത്തിൽ പുറത്തിറങ്ങി റിലീസ് ചെയ്ത ‘രാമലീല’ വൻഹിറ്റായിരുന്നെങ്കിലും, പിന്നീട് ദിലീപിന്റെ സിനിമകൾക്ക് നിരാശാജനകമായ പ്രതികരണങ്ങളായിരുന്നു.
കുറ്റവിമുക്തനായതിന് ശേഷമുള്ള ആദ്യ ചിത്രമായ ‘ഭ ഭ ബ’യിലൂടെ പഴയ പ്രേക്ഷകപിന്തുണ തിരിച്ചുപിടിക്കാനുള്ള ശ്രമത്തിലാണ് താരം.
‘ഭയം, ഭക്തി, ബഹുമാനം’ എന്നതിന്റെ ചുരുക്കരൂപമായ ഈ ചിത്രം ഒരു എന്റർടെയ്നറാണെന്നാണ് ആദ്യ പ്രതികരണങ്ങൾ.
ചിത്രത്തിൽ അതിഥിവേഷത്തിൽ എത്തുന്ന മോഹൻലാൽ ആണ് പ്രേക്ഷകരെ ഏറ്റവും ആവേശത്തിലാഴ്ത്തുന്നത്. ദിലീപ്–മോഹൻലാൽ കോമ്പിനേഷനിലെ രംഗങ്ങൾ തിയേറ്ററുകളിൽ വലിയ കൈയടിയാണ് നേടുന്നത്.
മോഹൻലാലിന്റെ ഇൻട്രോ സീനും ‘ഗില്ലി ബാബു’ എന്ന കഥാപാത്രവും സോഷ്യൽ മീഡിയയിൽ ‘ദ റിയൽ ഒജി’ എന്ന ഹാഷ്ടാഗോടെ ട്രെൻഡിങ്ങായി മാറിയിട്ടുണ്ട്.
അതേസമയം, ചിത്രത്തോട് സമ്മിശ്ര പ്രതികരണങ്ങളുമുണ്ട്. ചിലർ മോഹൻലാൽ–ദിലീപ് രംഗങ്ങളെ പ്രശംസിക്കുമ്പോൾ, കഥയും അവതരണവും പൂർണതയിലെത്തിയില്ലെന്ന വിമർശനങ്ങളും ഉയരുന്നുണ്ട്.
ശ്രീ ഗോകുലം മൂവീസ് ബാനറിൽ ഒരുക്കിയ ചിത്രം ധനഞ്ജയ് ശങ്കർ സംവിധാനം ചെയ്തതാണ്. നൂറിൻ ഷെരീഫും ഫാഹിം സഫറും ചേർന്നാണ് തിരക്കഥ.
വിനീത് ശ്രീനിവാസൻ, ധ്യാൻ ശ്രീനിവാസൻ, സാന്റി മാസ്റ്റർ, റെഡ്ഡിംഗ് കിങ്സ്ലി, ബാലു വർഗീസ്, ബൈജു സന്തോഷ്, സിദ്ധാർഥ് ഭരതൻ, ശരണ്യ പൊൻവർണ്ണൻ തുടങ്ങിയവരും ചിത്രത്തിൽ അണിനിരക്കുന്നു.
English Summary
After being acquitted in a long legal battle, actor Dileep’s comeback film Bha Bha Ba has opened to a strong start at the box office.
dileep-comeback-bha-bha-ba-box-office-opening
Dileep, Bha Bha Ba, Malayalam cinema, box office, Sacnilk, Mohanlal cameo, Christmas release, film review
