സർക്കാർ സ്കൂളിൽ നിന്നും കുട്ടികളെ തട്ടിക്കൊണ്ടുപോയി; രക്ഷപ്പെടുത്തി പൊലീസ്
ബെംഗളൂരു: കർണാടകയിലെ ധാർവാഡിൽ സർക്കാർ സ്കൂളിൽ നിന്ന് തട്ടിക്കൊണ്ടുപോയ രണ്ട് വിദ്യാർത്ഥികളെ പൊലീസ് നാടകീയമായി രക്ഷപ്പെടുത്തി.
കുട്ടികളുമായി പോയ ബൈക്ക് ഉത്തര കന്നഡ ജില്ലയിലെ ജോയ്ഡയിൽ അപകടത്തിൽപ്പെട്ടതോടെയാണ് പൊലീസിന് ഇടപെടാൻ സാധിച്ചത്. സംഭവത്തിൽ ഹുബ്ബള്ളി സ്വദേശിയായ മുഹമ്മദ് കരീമിനെ (50+) പൊലീസ് കസ്റ്റഡിയിലെടുത്തു.
ഇന്നലെ ഉച്ചഭക്ഷണത്തിന് ശേഷം ധാർവാഡിലെ കമലാപുര സർക്കാർ പ്രൈമറി സ്കൂളിൽ നിന്നാണ് രണ്ടാം, മൂന്നാം ക്ലാസ് വിദ്യാർത്ഥികളായ രണ്ട് കുട്ടികളെ കാണാതായത്.
ക്ലാസ് മുറിയിലെത്തിയ ഒരാൾ കുട്ടികളെ ബൈക്കിൽ കയറ്റി കൊണ്ടുപോയതായി സഹപാഠികൾ അറിയിച്ചതോടെ രക്ഷിതാക്കളും നാട്ടുകാരും സ്കൂളിലെത്തി പ്രതിഷേധിച്ചു. ഉടൻ തന്നെ പൊലീസ് സ്ഥലത്തെത്തി അന്വേഷണം ആരംഭിച്ചു.
സമീപത്തെ സിസിടിവി ദൃശ്യങ്ങൾ പരിശോധിച്ചതിൽ നിന്ന് 50 വയസിന് മുകളിലുള്ള ഒരാൾ കുട്ടികളുമായി ബൈക്കിൽ പോകുന്നത് വ്യക്തമായി.
അന്വേഷണം ശക്തമാക്കിയതിന്റെ ഭാഗമായി ഏകദേശം രണ്ടര മണിക്കൂറിനുശേഷം ജോയ്ഡയിൽ ഒരു ബൈക്ക് അപകടത്തിൽപ്പെട്ടതായും അതിൽ രണ്ട് കുട്ടികൾ ഉണ്ടെന്നുമുള്ള വിവരം പൊലീസിന് ലഭിച്ചു.
സംഭവസ്ഥലത്തെത്തിയ പൊലീസ് കുട്ടികൾ ധാർവാഡിൽ നിന്ന് കാണാതായവരാണെന്ന് സ്ഥിരീകരിച്ചു. ബൈക്കിൽ നിന്ന് വീണതിനെ തുടർന്ന് കുട്ടികൾക്ക് നേരിയ പരിക്കേറ്റിരുന്നു.
ബൈക്ക് ഓടിച്ചിരുന്ന മുഹമ്മദ് കരീം തലയ്ക്ക് പരിക്കേറ്റ് ആശുപത്രിയിൽ പ്രവേശിപ്പിക്കപ്പെട്ടു. ആരോഗ്യനില മെച്ചപ്പെട്ടതിന് ശേഷം ഇയാളെ അറസ്റ്റ് ചെയ്ത് വിശദമായി ചോദ്യം ചെയ്യാനാണ് പൊലീസിന്റെ തീരുമാനം.
കുട്ടികളെ തട്ടിക്കൊണ്ടുപോകാനുള്ള കാരണം ഇതുവരെ വ്യക്തമായിട്ടില്ല. പ്രഥമ ശുശ്രൂഷകൾ നൽകിയ ശേഷം കുട്ടികളെ മാതാപിതാക്കൾക്കൊപ്പം വിട്ടയച്ചു.
സംഭവം സർക്കാർ സ്കൂളുകളുടെ സുരക്ഷാ സംവിധാനങ്ങളെക്കുറിച്ച് വലിയ ചർച്ചകൾക്ക് വഴിയൊരുക്കിയിരിക്കുകയാണ്.
English Summary
Police in Karnataka dramatically rescued two primary school students who were kidnapped from a government school in Dharwad after the kidnapper met with a bike accident in Uttara Kannada’s Joida.
dharwad-school-children-kidnapped-rescued-bike-accident
Karnataka, Dharwad, School Safety, Child Kidnapping, Karnataka Police, Crime News
