ഹെഡ്മാസ്റ്ററെയും മൂന്ന് അധ്യാപകരെയും സസ്പെൻഡ് ചെയ്തു
ന്യൂഡൽഹി: ഡൽഹിയിലെ സെന്റ് കൊളമ്പ സ്കൂളിലെ പത്താം ക്ലാസ് വിദ്യാർത്ഥി ശൗര്യ പാട്ടീൽ മെട്രോ സ്റ്റേഷനിലെ പ്ലാറ്റ്ഫോമിൽ ചാടി ആത്മഹത്യ ചെയ്ത സംഭവത്തെ തുടർന്ന് സ്കൂളിലെ ഹെഡ്മാസ്റ്ററെയും മൂന്ന് അധ്യാപകരെയും സസ്പെൻഡ് ചെയ്തു.
വിദ്യാർത്ഥിയുടെ സ്കൂൾ ബാഗിൽ നിന്നും കണ്ടെത്തിയ ആത്മഹത്യാ കുറിപ്പിൽ അധ്യാപകരുടെ മാനസിക പീഡനമാണ് കടുംകൈക്ക് കാരണമെന്ന് പറഞ്ഞിരുന്നത്. ഇതിനെ അടിസ്ഥാനപ്പെടുത്തിയാണ് സ്കൂളിന്റെ നടപടി.
എന്നാൽ സസ്പെൻഷൻ മാത്രമല്ല, അധ്യാപകരെ പിരിച്ചുവിടണമെന്നാണ് രക്ഷിതാക്കളുടെ ആവശ്യം. വെറും കണ്ണിൽ പൊടിയിടാനുള്ള നടപടിയാണിതെന്ന് അവർ ആരോപിക്കുന്നു.
പ്രശ്നങ്ങൾ ശമിച്ചാൽ സസ്പെൻഡ് ചെയ്ത അധ്യാപകരെ സ്കൂൾ തിരിച്ചെടുക്കുമോയെന്ന ആശങ്കയും രക്ഷിതാക്കൾ പങ്കുവയ്ക്കുന്നു.
നവംബർ 18നാണ് ശൗര്യ പാട്ടീൽ ആത്മഹത്യ ചെയ്തത്. സ്കൂളിലേക്ക് പോകാൻ ഇറങ്ങിയ കുട്ടിയെ പിന്നീട് മെട്രോ സ്റ്റേഷനിൽ മരിച്ച നിലയിൽ കണ്ടെത്തുകയായിരുന്നു.
ആത്മഹത്യാ കുറിപ്പിൽ, സ്കൂളിൽ നേരിടുന്ന പരിഹാസം, അധിക്ഷേപം, ശാസനം എന്നിവ മൂലം താൻ കടുത്ത മാനസിക സമ്മർദ്ദത്തിലായിരുന്നുവെന്ന് കുട്ടി വ്യക്തമാക്കിയിരുന്നു.
മറ്റൊരു വിദ്യാർത്ഥിക്കും ഇത്തരത്തിലുള്ള പീഡനം സംഭവിക്കാതിരിക്കാൻ അധ്യാപകർക്കെതിരെ നടപടി വേണമെന്നതായിരുന്നു അദ്ദേഹത്തിന്റെ അവസാന ആഗ്രഹം.
ഏകദേശം ഒരു വർഷത്തോളമായി മകൻ അധ്യാപകരുടെ പരിഹാസത്തിനും മോശം പെരുമാറ്റത്തിനും ഇരയായിരുന്നു എന്ന് ശൗര്യയുടെ പിതാവ് പ്രദീപ് പാട്ടീൽ ആരോപിക്കുന്നു.
ചെറിയ കാര്യങ്ങൾ പോലും വലിയ പ്രശ്നമാക്കി നിരന്തരമായ ശാസനം നൽകുന്നത് കുട്ടിയെ തളർത്തിയെന്ന് പിതാവ് പറയുന്നു.
പരാതി നൽകിയിട്ടും സ്കൂൾ അധികാരികളുടെ ഭാഗത്ത് നിന്ന് മാറ്റമൊന്നും ഉണ്ടായില്ല. പരാതിപ്പെട്ടതിന്റെ പേരിൽ കുട്ടിയെ സ്കൂളിൽ നിന്ന് പുറത്താക്കുമെന്ന ഭീഷണിയും നൽകിയതായി പിതാവ് ആരോപിച്ചു.
ആത്മഹത്യക്ക് മണിക്കൂറുകൾ മുമ്പ് ഡാൻസ് പരിശീലനത്തിനിടെ വീണ ശൗര്യയെ അധ്യാപകർ പരസ്യമായി അപമാനിച്ചു. കരഞ്ഞിരുന്നപ്പോൾ, ‘എത്ര വേണമെങ്കിലും കരയാം, എനിക്കൊരു കുഴപ്പവും ഇല്ല’ എന്ന് ഒരു അധ്യാപിക പറഞ്ഞതായും പിതാവ് പറഞ്ഞു.
ENGLISH SUMMARY
A Class 10 student, Shaurya Patil, from St. Columba’s School in Delhi, died by suicide after jumping at a metro station. Following the incident, the school suspended the headmaster and three teachers. Shaurya left a suicide note in his school bag, alleging mental harassment and humiliation by teachers.
His father claimed that for nearly a year Shaurya faced constant ridicule, misconduct, and excessive scolding at school. Despite complaints, the school allegedly took no corrective action and even threatened to expel the boy. Hours before his death, he was publicly humiliated during a dance practice session.
Parents have demanded stronger action, saying mere suspension is an eyewash.
delhi-student-suicide-teachers-suspended
