എറണാകുളവും അങ്കമാലിയും വെച്ചുമാറാന് സിപിഎം; സാബു ജോര്ജ് സ്ഥാനാര്ത്ഥിയായേക്കും
കൊച്ചി: വരാനിരിക്കുന്ന നിയമസഭ തിരഞ്ഞെടുപ്പിനെ മുന്നില്കണ്ട് എറണാകുളം ജില്ലയില് ഇടതുമുന്നണിയില് പുതിയ രാഷ്ട്രീയ കണക്കുകൂട്ടലുകള് ചര്ച്ചയാകുന്നു.
എറണാകുളം, അങ്കമാലി മണ്ഡലങ്ങള് പരസ്പരം വെച്ചു മാറ്റാനുള്ള നീക്കമാണ് സിപിഎം പരിഗണിക്കുന്നതെന്നാണ് റിപ്പോര്ട്ടുകള്.
നിലവിലെ ചര്ച്ചകള് പ്രകാരം എറണാകുളം സീറ്റ് ഇന്ത്യന് സോഷ്യലിസ്റ്റ് ജനതാദളിന് (ISJD) നല്കുകയും, അതിന് പകരമായി അങ്കമാലി സീറ്റ് സിപിഎം ഏറ്റെടുക്കുകയും ചെയ്യുന്നതാണ് മുന്നണിയിലെ പ്രധാന നീക്കം.
ഇതിലൂടെ എറണാകുളം മണ്ഡലത്തിലെ സ്ഥാനാര്ത്ഥി തെരഞ്ഞെടുപ്പുമായി ബന്ധപ്പെട്ട ആശയക്കുഴപ്പങ്ങള് ഒഴിവാക്കാനാകുമെന്നാണ് സിപിഎം നേതൃത്വത്തിന്റെ കണക്കുകൂട്ടല്.
സീറ്റ് മാറ്റം യാഥാര്ത്ഥ്യമാകുന്നുവെങ്കില് എറണാകുളം മണ്ഡലത്തില് ഐഎസ്ജെഡി നേതാവും കൊച്ചി മുന് ഡെപ്യൂട്ടി മേയറുമായ സാബു ജോര്ജ് സ്ഥാനാര്ത്ഥിയാകാനാണ് സാധ്യത.
വിദ്യാര്ത്ഥി രാഷ്ട്രീയ കാലം മുതല് സിപിഎമ്മുമായി അടുത്ത ബന്ധം പുലര്ത്തുന്ന നേതാവാണ് സാബു ജോര്ജ്. ലത്തിന് സഭയുമായി ഉള്ള ബന്ധവും എല്ഡിഎഫിന് അനുകൂലമാകുമെന്ന വിലയിരുത്തലും മുന്നണിയില് ഉണ്ട്.
അതേസമയം അങ്കമാലി മണ്ഡലത്തില് പെരുമ്പാവൂര് മുന് എംഎല്എ സാജു പോളിനെ സ്ഥാനാര്ത്ഥിയാക്കാനാണ് സിപിഎം ആലോചിക്കുന്നത്. യാക്കോബായ സമുദായവുമായി അടുത്ത ബന്ധമുള്ള നേതാവായതിനാല് അങ്കമാലിയില് സാജു പോളിന് മികച്ച പിന്തുണ ലഭിക്കുമെന്നാണ് പാര്ട്ടി വിലയിരുത്തുന്നത്.
ആലുവ മണ്ഡലത്തില് ആലപ്പുഴ മുന് എംപി എ.എം. ആരിഫിന്റെ പേരും പരിഗണനയിലുണ്ടെന്നാണ് റിപ്പോര്ട്ടുകള്. കൂടാതെ തൃക്കാക്കരയില് സിപിഎം ഏരിയാ സെക്രട്ടറി എ.ജി. ഉദയകുമാറിന്റെ പേരും ചര്ച്ചയില് ഉണ്ടെന്നാണ് വിവരം.
ആദ്യഘട്ടത്തില് എറണാകുളത്ത് സ്വതന്ത്ര സ്ഥാനാര്ത്ഥിയെ പരീക്ഷിക്കാനുള്ള സാധ്യതയും സിപിഎം പരിശോധിച്ചിരുന്നെങ്കിലും ജില്ലാ നേതൃത്വത്തില് ഭിന്നാഭിപ്രായങ്ങള് ഉയര്ന്നതോടെ ആ നീക്കം ഉപേക്ഷിച്ചതായാണ് സൂചന.
English Summary
Reports suggest that the CPM and the Left Democratic Front are considering a seat swap in Ernakulam district ahead of the Kerala Assembly elections. The proposal involves giving the Ernakulam constituency to the Indian Socialist Janata Dal (ISJD) while CPM would take Angamaly. If finalized, ISJD leader and former Kochi Deputy Mayor Sabu George may contest from Ernakulam, while CPM is considering former Perumbavoor MLA Saju Paul for Angamaly. Former Alappuzha MP A.M. Ariff’s name is reportedly under consideration for the Aluva constituency, while A.G. Udayakumar may be fielded from Thrikkakara.
