449 കോടി ചെലവിൽ 13 ഏക്കറിൽ ഉയർന്ന കൊച്ചിൻ ക്യാൻസർ സെന്റർ; മുഖ്യമന്ത്രി ഉദ്ഘാടനം ചെയ്തു
കൊച്ചി: മധ്യകേരളത്തിലെ ആരോഗ്യ മേഖലയിലെ ദീർഘകാല ആവശ്യമായിരുന്ന കൊച്ചിൻ ക്യാൻസർ റിസർച്ച് സെന്റർ യാഥാർഥ്യമായി.
449 കോടി രൂപ ചെലവിൽ നിർമ്മിച്ച കേന്ദ്രം കളമശേരിയിൽ മുഖ്യമന്ത്രി പിണറായി വിജയൻ ഉദ്ഘാടനം ചെയ്തു.
കിഫ്ബിയുടെ പങ്ക് നിർണായകമെന്ന് മുഖ്യമന്ത്രി
കേരളം മുന്നോട്ടു പോകുന്നതിന് സാമ്പത്തിക പ്രതിസന്ധി വലിയ തടസമായിരുന്നുവെന്നും, ബജറ്റിന് പുറത്ത് ധനസ്രോതസുകൾ കണ്ടെത്താനാണ് കിഫ്ബിയെ പുനരുജ്ജീവിപ്പിച്ചത് എന്നും മുഖ്യമന്ത്രി പറഞ്ഞു.
ആരോഗ്യരംഗത്തും വിദ്യാഭ്യാസ മേഖലയിലും കിഫ്ബിയുടെ സംഭാവന വലുതാണെന്നും അദ്ദേഹം ചൂണ്ടിക്കാട്ടി.
മധ്യകേരളത്തിലെ മികച്ച ക്യാൻസർ ചികിത്സാ കേന്ദ്രമാക്കും
കൊച്ചിൻ ക്യാൻസർ റിസർച്ച് സെന്ററിനെ മധ്യകേരളത്തിലെ മികച്ച ക്യാൻസർ ചികിത്സാ കേന്ദ്രമാക്കി മാറ്റുമെന്നും മുഖ്യമന്ത്രി അറിയിച്ചു.
ജീവിതശൈലി രോഗങ്ങൾ ഒഴിവാക്കാൻ ജനങ്ങൾ മുൻകരുതൽ എടുക്കണമെന്നും അദ്ദേഹം കൂട്ടിച്ചേർത്തു.
13 ഏക്കറിൽ 9 നിലകളിലായി വൻ സൗകര്യം
കളമശേരി മെഡിക്കൽ കോളജിനോട് ചേർന്ന 13 ഏക്കർ ഭൂമിയിൽ ഒൻപത് നിലകളിലായി കേന്ദ്രം നിർമ്മിച്ചിരിക്കുന്നു.
63 ലക്ഷം ചതുരശ്ര അടിയാണ് വിസ്തീർണം.
ആദ്യഘട്ടത്തിൽ 100 ബെഡുകൾ
ആദ്യ ഘട്ടത്തിൽ 100 പേർക്ക് കിടത്തി ചികിത്സ ലഭ്യമാക്കാനാകും. നിർമ്മാണം മുഴുവനായും കിഫ്ബി ഫണ്ടുപയോഗിച്ചാണ് പൂർത്തിയാക്കിയത്.
വിമർശനങ്ങളും മറുപടിയും
പദ്ധതി പൂർത്തിയാകാതെ തെരഞ്ഞെടുപ്പ് മുന്നിൽകണ്ട് ഉദ്ഘാടനം നടത്തി എന്നായിരുന്നു കോൺഗ്രസിന്റെ വിമർശനം.
എന്നാൽ, ഒരു മാസത്തിനകം പ്രവർത്തനം പൂർണ സജ്ജമാകും എന്ന് കളമശ്ശേരി എംഎൽഎ കൂടിയായ മന്ത്രി പി രാജീവ് പറഞ്ഞു.
ഉദ്ഘാടന ചടങ്ങിൽ ആരോഗ്യമന്ത്രി വീണാ ജോർജ്ജും പങ്കെടുത്തു.
English Summary:
Chief Minister Pinarayi Vijayan inaugurated the Cochin Cancer Research Centre at Kalamassery, built at a cost of ₹449 crore. The Chief Minister highlighted the role of KIIFB in supporting major development projects, especially in the health sector, and said the centre would be developed into one of the best cancer treatment facilities in Central Kerala. Spread across 13 acres with a nine-storey building, the centre will initially provide 100 inpatient beds. While the Congress criticised the inauguration as premature, Minister P Rajeev stated that full operations would begin within a month.
