ഇന്ത്യൻ റെസ്റ്റോറന്റിൽ നിന്നും കഴിച്ച 40000 രൂപയുടെ ഭക്ഷണം പരിചയപ്പെടുത്തി യുവാവ്
ഭക്ഷണപ്രേമികളായ നമ്മളിൽ പലർക്കും പുതിയൊരു വിഭവം മാർക്കറ്റിൽ എത്തിയാൽ അത് രുചിച്ച് നോക്കാതെ ഒരു സമാധാനവും ഉണ്ടാകില്ല. ചിലർ നല്ല ഭക്ഷണത്തിനായി ദൂരദൂരങ്ങൾ യാത്ര ചെയ്യാൻ പോലും തയ്യാറാകും.
വില എത്രയായാലും, ഒരിക്കൽ ആ രുചി അനുഭവിക്കണമെന്ന ആഗ്രഹമുള്ളവരും കുറവല്ല. അത്തരത്തിലൊരു അനുഭവം സോഷ്യൽ മീഡിയയിൽ പങ്കുവെച്ചിരിക്കുകയാണ് അനുഷ്ക് ശർമ്മ എന്ന യുവാവ്.
ചിക്കാഗോയിലെ ഒരു വൺ മിഷലിൻ സ്റ്റാർ നേടിയ ഇന്ത്യൻ റസ്റ്റോറന്റിൽ നിന്ന് ഏകദേശം 40,000 രൂപ ചെലവഴിച്ചാണ് താനും കൂട്ടരും ഭക്ഷണം കഴിച്ചതെന്ന് അനുഷ്ക് വീഡിയോയിൽ പറയുന്നു.
“ഇത് ചിക്കാഗോയിലെ ഒരു ഇന്ത്യൻ മിഷലിൻ സ്റ്റാർ റെസ്റ്റോറന്റാണ്. വില കേട്ടാൽ ഞെട്ടാം, പക്ഷേ ആ അനുഭവം തീർച്ചയായും അതിനർഹമാണ്” എന്നും അദ്ദേഹം പറയുന്നു.
മേശയിൽ നിരത്തിയിരിക്കുന്ന വിഭവങ്ങൾ കാണിച്ചുകൊണ്ടാണ് വീഡിയോ ആരംഭിക്കുന്നത്. പരമ്പരാഗത ഇന്ത്യൻ വിഭവങ്ങളെ പുതുമയോടെ അവതരിപ്പിച്ച രീതിയെക്കുറിച്ചാണ് തുടർന്ന് അനുഷ്ക് വിശദീകരിക്കുന്നത്.
കടുകും കറിവേപ്പിലയും ചേർത്ത ധോക്ല, ബക്ക്വീറ്റ്–പാഷൻ ഫ്രൂട്ട്–ഗ്രീൻ ആപ്പിൾ ഫ്യൂഷൻ പാനിപൂരി, സ്ട്രോബെറിയും പുളിയും ചേർത്ത യോഗർട്ട് ചാട്ട്, ബട്ടർനട്ട് സ്ക്വാഷും തക്കാളി പച്ചടിയും ചേർത്ത ഉഴുന്നുവട എന്നിവയൊക്കെയും വീഡിയോയിൽ കാണാം.
മെയിൻ കോഴ്സായി സെലറിയക് കബാബ്, പനീർ കോഫ്ത തുടങ്ങിയ വിഭവങ്ങളാണ് ഒരുക്കിയിരുന്നത്. ഇതിനൊപ്പം വിവിധ ഡെസേർട്ടുകളും ഉൾപ്പെടുത്തിയിരുന്നു.
ഇന്ത്യൻ രുചിയുടെ ആത്മാവ് നഷ്ടപ്പെടാതെ തന്നെ വിഭവങ്ങൾ വളരെ മനോഹരമായും രുചികരമായും തയ്യാറാക്കിയിട്ടുണ്ടെന്നാണ് അനുഷ്കിന്റെ അഭിപ്രായം. ഭക്ഷണം ഏറെ ആസ്വദിച്ച് കഴിക്കുന്നതും വീഡിയോയിൽ കാണാം.
ഈ വീഡിയോ ഇതിനകം 15 ലക്ഷം ആളുകൾ കണ്ടുകഴിഞ്ഞു. നിരവധി പേർ ലൈക്കും കമന്റും രേഖപ്പെടുത്തി.
ഒരു ഇന്ത്യൻ റസ്റ്റോറന്റിന് മിഷലിൻ സ്റ്റാർ ലഭിച്ചതിലെ സന്തോഷം പലരും പങ്കുവെച്ചപ്പോൾ, “ഇത്രയും പണം കൊടുത്ത് ഭക്ഷണം കഴിക്കണോ?” എന്ന സംശയവും ചിലർ ഉയർത്തി.
“എന്റെ അമ്മ ഇതിലും നല്ല ഭക്ഷണം ഉണ്ടാക്കും” എന്നൊരു രസകരമായ കമന്റും ശ്രദ്ധ നേടി. എന്തായാലും, വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
English Summary
A food vlogger named Anushk Sharma has gone viral after sharing his experience of dining at a one Michelin-star Indian restaurant in Chicago, where he spent around ₹40,000 on a meal. In the video, he showcases creatively reimagined Indian dishes like fusion pani puri, dhokla, paneer kofta, and unique desserts, praising both the presentation and taste. While many viewers celebrated the global recognition of Indian cuisine, others questioned whether the high price was justified. The video has crossed 1.5 million views on social media.
chicago-michelin-star-indian-restaurant-40000-rupee-meal-viral-video
food vlog, Michelin star, Indian restaurant, Chicago, viral video, luxury dining, food lovers, social media trends
