ബി.ജെ.പിയുടെ മിഷൻ 2026; ലക്ഷ്യം 30% വോട്ട് വിഹിതം; ഇത്തവണം മൂന്ന് പ്രധാന മുദ്രാവാക്യങ്ങൾ; തയ്യാറാക്കിയത് അമിത്ഷായുടെ നേതൃത്വത്തിൽ
തിരുവനന്തപുരം: തദ്ദേശ തിരഞ്ഞെടുപ്പിൽ തിരുവനന്തപുരം കോർപ്പറേഷൻ ഭരണം പിടിച്ചെടുത്ത അനുഭവം മാതൃകയാക്കി, നിയമസഭാ തിരഞ്ഞെടുപ്പിൽ പരമാവധി നേട്ടം ലക്ഷ്യമിട്ട് ബി.ജെ.പി ‘മിഷൻ 2026’ എന്ന പ്രത്യേക രാഷ്ട്രീയ പദ്ധതി തയ്യാറാക്കി.
കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തിൽ എൻ.ഡി.എ നേതൃയോഗവും ബി.ജെ.പി കോർ കമ്മിറ്റിയോഗവും ചേർന്നാണ് മിഷൻ രൂപപ്പെടുത്തിയത്.
‘വികസിത കേരളം’, ‘സുരക്ഷിത കേരളം’, ‘ശബരിമല വിശ്വാസ സംരക്ഷണം’ എന്നീ മുദ്രാവാക്യങ്ങളിലൂന്നിയാണ് മിഷൻ 2026. സംസ്ഥാനത്ത് പാർട്ടിയുടെ വോട്ട് വിഹിതം 30 ശതമാനത്തിലേക്ക് ഉയർത്തുക എന്നതാണ് പ്രധാന ലക്ഷ്യം.
പ്രധാനമന്ത്രി നരേന്ദ്ര മോദിയുടെ കേരള സന്ദർശനത്തോടെ മിഷൻ ഔദ്യോഗികമായി ലോഞ്ച് ചെയ്യും.
തദ്ദേശ തിരഞ്ഞെടുപ്പിൽ ‘വികസിത കേരളം’ എന്ന പ്രമേയത്തോടെയാണ് ബി.ജെ.പി രംഗത്തെത്തിയത്.
മൊത്തം വോട്ടിൽ വർധന ഉണ്ടായെങ്കിലും ക്രൈസ്തവ മതന്യൂനപക്ഷ വോട്ടുകളിലും പാർട്ടിയുടെ അടിസ്ഥാന വോട്ടിലും പ്രതീക്ഷിച്ച മുന്നേറ്റം ഉണ്ടാകാത്തതായാണ് പാർട്ടി വിലയിരുത്തൽ.
ഇതിന്റെ പശ്ചാത്തലത്തിൽ, മിഷൻ 2026ൽ ജമാഅത്തെ ഇസ്ലാമി, എസ്.ഡി.പി.ഐ എന്നിവരുമായി ബന്ധപ്പെട്ട മുസ്ലീം മതതീവ്രവാദത്തിനെതിരായ പോരാട്ടത്തിന് കൂടുതൽ ഊന്നൽ നൽകാനും തീരുമാനിച്ചിട്ടുണ്ട്.
ശബരിമല സ്വർണക്കൊള്ള കേസിലും ശക്തമായ രാഷ്ട്രീയ പോരാട്ടം നടത്താനാണ് തീരുമാനം.
മിഷൻ 2025 സംബന്ധിച്ച് സംസ്ഥാന അധ്യക്ഷൻ രാജീവ് ചന്ദ്രശേഖർ അവതരിപ്പിച്ച റിപ്പോർട്ടിൽ ലക്ഷ്യങ്ങൾ ഏറെക്കുറെ കൈവരിച്ചതായി വിലയിരുത്തി.
എല്ലാ സീറ്റുകളിലും മത്സരിക്കുക, പാർട്ടിയിലെ ഗ്രൂപ്പ് പ്രവർത്തനം അവസാനിപ്പിക്കുക, എൻ.ഡി.എ ജയിക്കുന്ന പ്രസ്ഥാനമാണെന്ന് സ്ഥാപിക്കുക, തലസ്ഥാന ഭരണം പിടിക്കുക, ഭരിക്കുന്ന പഞ്ചായത്തുകളുടെ എണ്ണം ഇരട്ടിയാക്കുക തുടങ്ങിയ ലക്ഷ്യങ്ങൾ സാധ്യമായതായി റിപ്പോർട്ടിൽ പറയുന്നു.
14 പഞ്ചായത്തുകളിൽ നിന്ന് 30 പഞ്ചായത്തുകളുടെ ഭരണം നേടുകയും 79 പഞ്ചായത്തുകളിൽ രണ്ടാംകക്ഷിയാകുകയും ചെയ്തു.
തിരഞ്ഞെടുപ്പിൽ ഭരണവിരുദ്ധ വികാരം ശക്തമായിരുന്നുവെന്നും റിപ്പോർട്ടിൽ ചൂണ്ടിക്കാട്ടി.
മിഷൻ 2026ൽ യു.ഡി.എഫിനെ മുഖ്യ രാഷ്ട്രീയ എതിരാളിയായി കണ്ടുള്ള പ്രചാരണമാണ് ബി.ജെ.പി ആസൂത്രണം ചെയ്യുന്നത്.
യു.ഡി.എഫിനെയും എൽ.ഡി.എഫിനെയും നിയന്ത്രിക്കുന്നത് ജമാഅത്തെ ഇസ്ലാമിയും അനുബന്ധ സംഘടനകളുമാണെന്ന വാദവും ശക്തമാക്കും.
ശബരിമല വിഷയത്തിലും മുസ്ലീം തീവ്രവാദ വിഷയത്തിലും ഇടതും വലതും മുന്നണികൾ സ്വീകരിക്കുന്ന സമാന നിലപാടുകൾ തുറന്നുകാട്ടുമെന്നും, മുസ്ലീം തീവ്രവാദത്തെ എതിർക്കുന്നവർക്ക് സുരക്ഷയുടെ പ്രതീക്ഷയായി എൻ.ഡി.എയെ അവതരിപ്പിക്കുകയുമാണ് മിഷൻ 2026ന്റെ ലക്ഷ്യം.
English Summary
The BJP has launched “Mission 2026” under the leadership of Union Home Minister Amit Shah, aiming to maximize gains in the Kerala Assembly elections.
bjp-mission-2026-kerala-assembly-election-strategy
BJP, Mission 2026, Kerala Politics, Assembly Elections, Amit Shah, NDA, Sabarimala, Kerala News
