ദുബായിൽ പിടിയിലായ യാചകന് മൂന്ന് ആഡംബര കാറുകൾ
ദുബായിൽ ഭിക്ഷാടനത്തിനെതിരെ പോലീസ് നടത്തുന്ന ശക്തമായ പരിശോധനകളിൽ ഞെട്ടിക്കുന്ന വിവരങ്ങളാണ് പുറത്തുവരുന്നത്.
ഭിക്ഷാടനത്തിനിടെ പിടിയിലായ ഒരു വ്യക്തി മൂന്ന് ആഡംബര കാറുകളുടെ ഉടമയാണെന്ന വാർത്ത അന്താരാഷ്ട്ര തലത്തിൽ തന്നെ ശ്രദ്ധിക്കപ്പെട്ടിരിക്കുകയാണ്.
സ്വന്തമായി വലിയ സമ്പാദ്യവും ആഡംബര വാഹനങ്ങളും ഉള്ളപ്പോഴും യാചകന്റെ വേഷം കെട്ടി ജനങ്ങളെ വഞ്ചിക്കുന്ന ഇത്തരം രീതികൾ ഗൗരവകരമാണെന്ന് ദുബായ് പോലീസിലെ ഡയറക്ടർ ബ്രിഗേഡിയർ അലി സലേം അൽ ഷംസി വ്യക്തമാക്കി.
ജനങ്ങളുടെ സഹതാപം ചൂഷണം ചെയ്ത് വലിയ രീതിയിൽ പണം സമ്പാദിക്കുന്ന സംഘങ്ങൾ നഗരത്തിൽ സജീവമാണെന്നാണ് ഇത് സൂചിപ്പിക്കുന്നത്.
സമാനമായ മറ്റൊരു സംഭവത്തിൽ, രണ്ടരവയസ്സുള്ള കുഞ്ഞിനെ ഉപയോഗിച്ച് ഭിക്ഷാടനം നടത്തിയിരുന്ന ഏഷ്യൻ വംശജനെ പോലീസ് പിടികൂടി.
ഇയാളുടെ പക്കൽ നിന്നും വിവിധ വിദേശ കറൻസികളിലായി ഏകദേശം 20,000 ദിർഹമാണ് കണ്ടെടുത്തത്.
സന്ദർശക വിസയിൽ ദുബായിൽ എത്തിയ ഇയാൾ വെറും ചുരുങ്ങിയ ദിവസങ്ങൾക്കുള്ളിലാണ് ഇത്രയും വലിയ തുക യാചനയിലൂടെ കൈക്കലാക്കിയത്.
കുഞ്ഞുങ്ങളെ മുൻനിർത്തി സഹതാപം പിടിച്ചുപറ്റുന്ന ഇത്തരം സംഘങ്ങളെ കർശനമായി നിരീക്ഷിച്ചു വരികയാണെന്നും പ്രതിയെ മേൽനടപടികൾക്കായി പബ്ലിക് പ്രോസിക്യൂഷന് കൈമാറിയതായും പോലീസ് അറിയിച്ചു.
മറ്റൊരു തട്ടിപ്പിൽ, മാർക്കറ്റിൽ പായവിരിച്ച് ഭിക്ഷാടനം നടത്തിയിരുന്ന ആളെ പരിശോധിച്ചപ്പോൾ പായയ്ക്കടിയിൽ ഒളിപ്പിച്ച നിലയിൽ 25,000 ദിർഹം പോലീസ് കണ്ടെടുത്തു.
പത്തു വയസ്സിന് മുകളിലുള്ള കുട്ടികളെ സ്കൂളിൽ വിടാതെ ഭിക്ഷാടനത്തിന് ഉപയോഗിക്കുന്ന കുടുംബങ്ങളെയും കഴിഞ്ഞ വർഷങ്ങളിൽ പോലീസ് പിടികൂടിയിട്ടുണ്ട്.
ഏഴ് വയസ്സുള്ള കുട്ടികളെ വരെ ഇത്തരം മനുഷ്യത്വവിരുദ്ധമായ പ്രവർത്തികളിലേക്ക് തള്ളിവിടുന്ന സംഘങ്ങൾക്കെതിരെ ശക്തമായ നിയമനടപടികൾ ഉണ്ടാകുമെന്ന് ക്രിമിനൽ ആൻഡ് ഇൻവെസ്റ്റിഗേഷൻ വകുപ്പിലെ ക്യാപ്റ്റൻ അമ്മാർ താരിഖ് മുന്നറിയിപ്പ് നൽകി.
ദുബായ് നിയമപ്രകാരം സംഘങ്ങളായി ചേർന്ന് ഭിക്ഷാടനം നടത്തുന്നത് പത്ത് വർഷം വരെ തടവ് ശിക്ഷ ലഭിക്കാവുന്ന വലിയ കുറ്റമാണ്.
എങ്കിലും കഴിഞ്ഞ വർഷങ്ങളെ അപേക്ഷിച്ച് ദുബായിൽ ഭിക്ഷാടന കേസുകളിൽ വലിയ കുറവുണ്ടായിട്ടുണ്ട് എന്നത് ആശ്വാസകരമാണ്.
2025-നെ അപേക്ഷിച്ച് ഇത്തരം കേസുകളിൽ 70 ശതമാനം കുറവാണ് രേഖപ്പെടുത്തിയിരിക്കുന്നത്. കഴിഞ്ഞ അഞ്ച് വർഷത്തിനിടെ ആകെ 1801 ഭിക്ഷാടന കേസുകളാണ് ദുബായിൽ രജിസ്റ്റർ ചെയ്തിട്ടുള്ളത്.
ജനങ്ങൾ ജാഗ്രത പാലിക്കണമെന്നും അനർഹരായവർക്ക് സഹായങ്ങൾ നൽകി തട്ടിപ്പുകാരെ പ്രോത്സാഹിപ്പിക്കരുതെന്നും പോലീസ് അഭ്യർത്ഥിച്ചു.
