തൃത്താല ബ്ലോക്ക് പഞ്ചായത്തംഗം ബാവ മാളിയേക്കല്‍: സ്വന്തം ചെലവില്‍ റോഡും കുടിവെള്ള പദ്ധതികളും നിര്‍മ്മിച്ച് മാതൃകയായി

സ്വന്തം പണം ചെലവഴിച്ച് പൊതുപ്രവർത്തനം; മൂന്നര ലക്ഷം രൂപ ചിലവിൽ നാട്ടുകാർക്കായി റോഡ് നിർമ്മിച്ചു

പാലക്കാട്: പാലക്കാട് ജില്ലയിലെ തൃത്താല ബ്ലോക്ക് പഞ്ചായത്തംഗം ബാവ മാളിയേക്കൽ ജനസേവനത്തിന് പുതിയ മാതൃകയായിരിക്കുന്നു.

പട്ടിത്തറ – ചാലിശ്ശേരി പഞ്ചായത്തുകളെ ബന്ധിപ്പിക്കുന്ന കോട്ടോപ്പാടം ചുടുവയൽ റോഡ് അദ്ദേഹം സ്വന്തം പോക്കറ്റിൽ നിന്നും മൂന്നര ലക്ഷം രൂപ ചെലവഴിച്ച് നിർമ്മിച്ചു.

130 മീറ്റർ നീളവും മൂന്ന് മീറ്റർ വീതിയിലും നാലിഞ്ച് കനവും ഉള്ള ഈ റോഡിന്റെ നിർമ്മാണം അന്തിമ ഘട്ടത്തിലാണ്.

പഞ്ചായത്തിൻ്റെ ഭാഗത്തില്‍ നിന്ന്‌ നിർമ്മിച്ചാൽ ഏഴ് ലക്ഷത്തോളം ചെലവ് വരുമായിരുന്നുവെന്നാണ് കണക്ക്.

മധുരപാനീയങ്ങളുടെ ശീലം വൃക്കയെ തളർത്തി; യുവതിയിൽ നിന്ന് 300 കല്ലുകൾ നീക്കം ചെയ്തു

മുൻപ് തന്നെ സ്വന്തം ചിലവിൽ നിർമ്മിച്ച റോഡുകളും കുടിവെള്ള പദ്ധതികളും

ചില മാസങ്ങൾക്ക് മുമ്പ് പട്ടിത്തറ പഞ്ചായത്തിലെ നൗഷാദ് പടി റോഡും ബാവ മാളിയേക്കൽ സ്വന്തം ചിലവിൽ ഒരു ലക്ഷം രൂപ ചെലവഴിച്ച് നിർമ്മിച്ചിരുന്നു.

അതുപോലെ തന്നെ പത്തോളം വീടുകൾക്കായി കുഴൽ കിണർ നിർമ്മിച്ച്, 5000 ലിറ്റർ ടാങ്ക് സ്ഥാപിച്ചതും അദ്ദേഹമാണ്.

അങ്കണവാടികൾക്കും വീട്ടുകാർക്കും അടിസ്ഥാന സൗകര്യങ്ങൾ

കാശാമുക്ക് അങ്കണവാടിക്ക് ചുറ്റുമതിൽ, പാറപ്പുറം അങ്കണവാടിയുടെ മുറ്റത്ത് ടൈൽ വിരിക്കൽ, ചിറ്റപ്പുറത്ത് 25 ഓളം വീടുകൾക്കായി കുടിവെള്ള പദ്ധതി, പഞ്ചായത്ത് കിണറിന് ഇരുമ്പ് നെറ്റ് സ്ഥാപിക്കൽ തുടങ്ങിയ നിരവധി പദ്ധതികളും ബാവ മാളിയേക്കൽ സ്വന്തം ചിലവിൽ പൂർത്തിയാക്കി.

ഓണറേറിയം പോലും നാട്ടുകാർക്കായി

ബാവ മാളിയേക്കൽ തന്റെ ഓണറേറിയം പോലും സ്വന്തമായി കൈപ്പറ്റാതെ അർഹരായ നാട്ടുകാർക്കായി ചിലവഴിക്കുന്നു.

ഓരോ വർഷവും പാവപ്പെട്ടവർക്ക് ആട്, ടൈലറിങ്ങ് മെഷീൻ, വയോധികർക്കുള്ള കട്ടിൽ എന്നിവയും വിതരണം ചെയ്യുന്നു.

രോഗികൾക്കായി ചികിത്സാ ധനസഹായവും അദ്ദേഹം നൽകുന്നുണ്ട്.

ജനങ്ങൾക്ക് നൽകിയ വാഗ്ദാനങ്ങൾ പാലിക്കാനാണ് ലക്ഷ്യം

തന്റെ സേവനകാലയളവിൽ ജനങ്ങൾക്ക് നൽകിയ എല്ലാ വാഗ്ദാനങ്ങളും പൂർത്തിയാക്കുന്നതാണ്‌ ലക്ഷ്യമെന്ന് ബാവ മാളിയേക്കൽ വ്യക്തമാക്കി.

പൊതുസേവനത്തിന് സ്വന്തം സമ്പാദ്യം ചെലവഴിക്കുന്ന അദ്ദേഹം നാട്ടുകാരുടെ ഹൃദയം കീഴടക്കിയിരിക്കുകയാണ്‌.

English Summary:

Bava Maliyekkal, a member of the Thrithala Block Panchayat in Palakkad, has spent ₹3.5 lakh from his own pocket to construct the Kottoppadam-Chuduvayal road connecting Pattithara and Chalissery panchayats. He has previously funded a ₹1 lakh road, built tube wells with a 5000-litre tank, and provided walls, tiles, and water projects for local anganwadis and houses. Refusing to take his honorarium, he regularly donates livestock, tailoring machines, and beds to the needy, along with medical aid. His goal is to fulfill every promise made to the people during his term.