ഇന്ത്യയിലെ ടു വീലറുകളിൽ ഏറ്റവും ജനപ്രിയമായ മോഡലാണ് ചേതക്. പുതുവർഷത്തിൽ ചേതക് ഇലക്ട്രിക് സ്കൂട്ടർ അവതരിപ്പിക്കാനൊരുങ്ങുകയാണ് പ്രമുഖ വാഹന നിർമാണ കമ്പനിയായ ബജാജ്. 2020ൽ ചേതക്കിന്റെ ഇലക്ട്രിക് പതിപ്പ് ബജാജ് പുറത്തിറക്കിയിരുന്നു. പിന്നാലെ നിരവധി അപ്ഡേറ്റുകളും മോഡലിന് കൊണ്ടുവന്നിരുന്നു. ഏറ്റവുമൊടുവിലാണ് ചേതക്കിന്റെ പുതിയ ഇലക്ടിക് സ്കൂട്ടറുമായി ബജാജ് വിപണി വാഴാൻ എത്തുന്നത്. ജനുവരി ഒൻപതിന് സ്കൂട്ടർ ലോഞ്ച് ചെയ്യും.
ഇക്കഴിഞ്ഞ ഡിസംബറിൽ മിതമായ നിരക്കിൽ ചേതക്കിന്റെ അർബൻ വേരിയന്റ് പുറത്തിറക്കിയിരുന്നു. ഇതിന് ചില പരിഷ്കാരങ്ങൾ വരുത്തിയാകും പുതിയ മോഡൽ പുറത്തിറങ്ങുകയെന്നാണ് റിപ്പോർട്ട്. പ്രകടനത്തിന്റെ കാര്യത്തിലും നിലവിലെ മോഡലിനെക്കാൾ ഒരുപടി മുകളിലാണ് പുതിയ ചേതക്. സവിശേഷതകളറിയാം.
> 3.2 കിലോവാട്ടുള്ള ബാറ്ററിയാണ് സ്കൂട്ടറിൽ ഉപയോഗിച്ചിരിക്കുന്നത്. ഒറ്റ ചാർജിൽ 127 കിലോമീറ്റർ ദൂരം സഞ്ചരിക്കാനും പുതിയ മോഡലിനാകും. നേരത്തേയുണ്ടായിരുന്ന 2.88 കിലോവാട്ട് ബാറ്ററിയുടെ സ്ഥാനത്താണ് മാറ്റം വരുത്തിയിരിക്കുന്നത്. പൂജ്യം മുതൽ 100 ശതമാനം വരെ ചാർജാകാൻ ഏകദേശം നാലര മണിക്കൂർ നേരമെടുക്കുമെന്നാണ് കണക്കുകൾ സൂചിപ്പിക്കുന്നത്.
> ഇപ്പോഴുള്ള മോഡലിന്റെ ഏറ്റവും കൂടിയ വേഗത മണിക്കൂറിൽ 63 കിലോമീറ്റർ ആയിരുന്നെങ്കിൽ പുതിയതിന് 73 കിലോമീറ്ററാണ്. കൂടാതെ വൃത്താകൃതിയിലുള്ള എൽ സി ഡി സ്ക്രീൻ മാറ്റി ടി എഫ് ടി സ്ക്രീനും ബജാജ് പുതിയ ചേതക്കിൽ ഉൾപ്പെടുത്തിയിട്ടുണ്ട്.
> ടയർ പ്രഷർ മോണിറ്ററിങ് സിസ്റ്റം (TPMS), റിമോട്ട് ലോക്ക്/അൺലോക്ക്, ബ്ലൂടൂത്ത് കണക്റ്റിവിറ്റി,ടേൺ-ബൈ-ടേൺ നാവിഗേഷൻ എന്നിവയടക്കം നിരവധി പ്രീമിയം ഫീച്ചറുകളും ഇ-സ്കൂട്ടറിലുണ്ടാകും. ഒപ്പം സീറ്റിനടിയിലെ സ്റ്റോറേജ് കപ്പാസിറ്റിയും കൂടും. നിലവിൽ 18 ലിറ്ററായ സംഭരണശേഷി 21 ആയി ഉയരും.
Read Also: ഓലയുടെ കുതിപ്പിന് ബ്രേക്കിടാൻ ആതർ എനർജി; റോക്കറ്റ് സ്കൂട്ടർ ഉടനെത്തും
