ആഗോള അയ്യപ്പ സംഗമം: ഓഡിറ്റ് റിപ്പോർട്ടിൽ പിഴവുകൾ; ദേവസ്വം ബോർഡ് വിശദീകരണവുമായി രംഗത്ത്
തിരുവനന്തപുരം: ആഗോള അയ്യപ്പ സംഗമവുമായി ബന്ധപ്പെട്ട ഓഡിറ്റ് റിപ്പോർട്ടിൽ പിഴവുകൾ ഉണ്ടായിട്ടുണ്ടെന്ന് ദേവസ്വം ബോർഡ് പ്രസിഡന്റ് കെ. ജയകുമാർ സ്ഥിരീകരിച്ചു.
റിപ്പോർട്ട് ബോർഡ് പരിശോധിച്ചുവെന്നും അത് അന്തിമമല്ലെന്നും വാർത്താസമ്മേളനത്തിൽ അദ്ദേഹം വ്യക്തമാക്കി. ഈ മാസം 27ന് മുമ്പ് റിപ്പോർട്ടിൽ കൃത്യത വരുത്തുമെന്നും ഇതിനായി പ്രത്യേക ടാസ്ക് ഫോഴ്സ് രൂപീകരിച്ചതായും അറിയിച്ചു.
ആഗോള അയ്യപ്പ സംഗമത്തിന്റെ ഓഡിറ്റ് റിപ്പോർട്ട് വിശദമായി പരിശോധിച്ചത് ഇന്ന് മാത്രമാണെന്ന് ജയകുമാർ പറഞ്ഞു.
സമയപരിധി പാലിക്കേണ്ടതിനാൽ റിപ്പോർട്ട് അതേപടി സമർപ്പിക്കേണ്ടിവന്നതാണെന്നും അദ്ദേഹം വിശദീകരിച്ചു. ചില സംശയങ്ങൾക്ക് വ്യക്തമായ മറുപടി ലഭിച്ചതിനുശേഷമേ റിപ്പോർട്ട് അന്തിമമാക്കാൻ കഴിയൂ.
ഇത് ഓഡിറ്ററുടെ വീഴ്ചയല്ല, മറിച്ച് ആവശ്യമായ വിശദീകരണങ്ങൾ ലഭിക്കാത്തതുകൊണ്ടുണ്ടായ പ്രശ്നമാണെന്നും അദ്ദേഹം പറഞ്ഞു. എല്ലാ കാര്യങ്ങളിലും വ്യക്തത വരുത്തിയശേഷം റിപ്പോർട്ട് ഹൈക്കോടതിയിൽ സമർപ്പിക്കുമെന്നും അറിയിച്ചു.
നന്ദഗോവിന്ദൻ ഭജൻസും ഭക്ഷണവുമായി ബന്ധപ്പെട്ട ചില കാര്യങ്ങളിലും പിഴവുകൾ ഉണ്ടായതായി അദ്ദേഹം പറഞ്ഞു. എല്ലാ ക്ലെയിംസും അംഗീകരിക്കാൻ കഴിയില്ലെന്നും മൊത്തച്ചെലവ് 4.99 കോടിയായി നിജപ്പെടുത്തുമെന്നും അറിയിച്ചു.
അദാനി ഗ്രൂപ്പിൽ നിന്ന് 3.85 കോടി രൂപ സ്പോൺസർഷിപ്പ് ലഭിക്കുമെന്നും, ബാക്കിയുള്ള 1.15 കോടി രൂപ നൽകാനുള്ള ബാധ്യത ഉണ്ടെന്നും പറഞ്ഞു.
ബോർഡ് സ്വന്തം ഫണ്ടിൽ നിന്ന് പണം ചെലവഴിക്കില്ലെന്നും, മുൻകൂട്ടി വാഗ്ദാനം ചെയ്ത മറ്റ് സ്പോൺസർമാരെ സമീപിക്കുമെന്നും അദ്ദേഹം കൂട്ടിച്ചേർത്തു.
ഊരാലുങ്കൽ കമ്പനി 7 കോടി രൂപ ആവശ്യപ്പെട്ടിട്ടുണ്ടെന്നും, അവർ ഉപകരാർ നൽകിയാൽ അതിൽ തെറ്റില്ലെന്നും, ബില്ലുകൾ ലഭിച്ച ശേഷം വിലയിരുത്തുമെന്നും ദേവസ്വം ബോർഡ് പ്രസിഡന്റ് വ്യക്തമാക്കി.
English Summary
Devaswom Board President K. Jayakumar admitted errors in the audit report of the Global Ayyappa Meet, stating it is not final and will be corrected before February 27 by a special task force. He said the report was submitted earlier only to meet deadlines and that discrepancies arose due to incomplete clarifications, not auditor fault. Total expenses will be capped at ₹4.99 crore, with ₹3.85 crore expected as sponsorship from Adani and the rest to be raised from other sponsors.
ayyappa-meet-audit-errors-devaswom-board
Ayyappa Sangamam, Devaswom Board, Audit Report, Kerala News, K Jayakumar, Temple Administration, Finance Audit
