TOP NEWS
തിരുവനന്തപുരം: തലസ്ഥാനത്ത് സിഎന്‍ജി ക്ഷാമത്തില്‍ വലഞ്ഞ് ഓട്ടോ തൊഴിലാളികളും വാഹന ഉടമകളും. ആവശ്യത്തിന് സിഎന്‍ജി എത്താത്തതിനാൽ മിക്ക പമ്പുകളിലും നീണ്ട നിരയാണ് അനുഭവപ്പെടുന്നത്. ഇന്ധന ക്ഷാമം രൂക്ഷമായതോടെ ചെലവ് കുറയുമെന്ന് കരുതി സിഎൻജിയിലേക്ക് മാറിയ ഓട്ടോ തൊഴിലാളികളാണ് ദുരിതത്തിലായത്.
തിരുവനന്തപുരം നഗരത്തിൽ ആയിരത്തിലധികം സിഎന്‍ജി ഓട്ടോകളാണ് സർവീസ് നടത്തുന്നത്. പുറമെ കാറുകളും ബസുകളുമുണ്ട്. ഇത്രയും വാഹനങ്ങള്‍ക്ക് ഇന്ധനം നിറയ്ക്കാന്‍ ആകെയുള്ളത് സിഎന്‍ജി ലഭിക്കുന്ന അഞ്ചു പമ്പുകള്‍ മാത്രമാണ് തലസ്ഥാനത്ത് ഉള്ളത്. എന്നാൽ ഇവിടെ ആവശ്യത്തിനനുസരിച്ച് ഇന്ധനം ലഭിക്കുന്നുമില്ല. വാഹനപ്പെരുപ്പത്തിന് അനുസരിച്ച് ഇന്ധനം ലഭ്യമാക്കുക, പമ്പുകളുടെ എണ്ണം കൂട്ടുക എന്നത് മാത്രമാണ് ഈ ദുരിതത്തിന് പരിഹാരം.
പരിസ്ഥിതി സൗഹൃദം, പെട്രോള്‍ – ഡീസല്‍ വില വര്‍ധന ബാധിക്കില്ല എന്നിങ്ങനെയുള്ള വാഗ്ദാനങ്ങള്‍ കേട്ടാണ് പലരും സിഎന്‍ജി ഓട്ടോയിലേക്ക് മാറിയത്. പക്ഷെ ഇന്ധനം കിട്ടാതായതോടെ സിഎന്‍ജി ഓട്ടോ നിരത്തിലിറക്കി കുടുങ്ങിയ അവസ്ഥയിലാണ് തൊഴിലാളികള്‍. ഓട്ടം ഒഴിവാക്കി ഇന്ധനം നിറയ്ക്കാന്‍ മാത്രം മണിക്കൂറുകളാണ് കത്തിനിൽക്കുന്നത്. എന്നാൽ നീണ്ട വരി കടന്നെത്തുമ്പോഴേക്കും സ്റ്റോക്കും തീരുകയും ചെയ്യും.
