ന്യൂഡൽഹി: ഐസിഎസ്ഇ പത്താംക്ലാസ്, ഐഎസ് സി പന്ത്രണ്ടാം ക്ലാസ് വിദ്യാർഥികൾക്ക് ഉടനടി മാർക്ക്ഷീറ്റ് നൽകാൻ കേന്ദ്ര ഐടി മന്ത്രാലയം.
പരീക്ഷാഫലം, മാർക്ക് ഷീറ്റ്, സർട്ടിഫിക്കറ്റുകൾ എന്നിവ തത്സമയം ഡിജിലോക്കറിൽ നിന്ന് ആക്സസ് ചെയ്യാൻ കഴിയുമെന്നാണ് അറിയിപ്പ്. വിദ്യാർത്ഥികൾക്ക് അവരുടെ ആധികാരിക ഡിജിറ്റൽ രേഖകൾ എപ്പോൾ വേണമെങ്കിലും പ്ലാറ്റ്ഫോമിൽ നിന്ന് ഡിജിറ്റൽ ഫോർമാറ്റിൽ ആക്സസ് ചെയ്യാൻ കഴിയും.
ഐസിഎസ്ഇയിൽ 2,43,617 വിദ്യാർഥികൾ പരീക്ഷയെഴുതിയതിൽ 2,42,328 പേരും ഐഎസ്സി പരീക്ഷയെഴുതിയ 99,901 പേരിൽ 98,088 പേരുമാണ് ഇന്ത്യയിലും വിദേശത്തുമായി വിജയിച്ചത്. ഫലം പ്രഖ്യാപിച്ച ഉടൻ തന്നെ 3.43 ലക്ഷത്തിലധികം വിദ്യാർഥികൾക്ക് മാർക്ക് ഷീറ്റുകളും കൗൺസിൽ ഫോർ ദി ഇന്ത്യൻ സ്കൂൾ സർട്ടിഫിക്കറ്റ് എക്സാമിനേഷൻസ് (സിഐഎസ്സിഇ) നൽകുന്ന സർട്ടിഫിക്കറ്റുകളും ഡിജിലോക്കറിൽ ആക്സസ് ചെയ്യാനുള്ള ക്രമീകരണം ഒരുക്കിയിട്ടുള്ളതായും മന്ത്രാലയം അറിയിച്ചു. ബോർഡുകളും സർവകലാശാലകളും മറ്റ് സ്ഥാപനങ്ങളും ഡിജിറ്റൽ ഫോർമാറ്റിൽ നൽകുന്ന അക്കാദമിക രേഖകൾ ആക്സസ് ചെയ്യുന്നതിന് സുരക്ഷിതവും വിശ്വസനീയവും പ്ലാറ്റ്ഫോമാണ് ഡിജിലോക്കറിൽ ഒരുക്കിയിരിക്കുന്നത്.
