കോഴിക്കോട്: സംസ്ഥാനത്ത് ട്രെയിനിൽ ടിടിഇക്ക് നേരെ വീണ്ടും അക്രമം. മംഗലാപുരം-തിരുവനന്തപുരം മാവേലി എക്സ്പ്രസിലെ ടിടിഇ രാജസ്ഥാന് സ്വദേശി വിക്രം കുമാര് മീണയ്ക്കു നേരെയാണ് ആക്രമണം ഉണ്ടായത്. ഇന്നലെ രാത്രി പത്തുമണിയോടെ തിരൂരിന് അടുത്തു വെച്ചായിരുന്നു സംഭവം. മൂക്കിന് ഇടിയേറ്റ മീണ ആശുപത്രിയില് ചികിത്സയിൽ തുടരുകയാണ്.
റിസര്വേഷന് കോച്ചില് ടിക്കറ്റില്ലാതെ യാത്ര ചെയ്ത ആളാണ് ആക്രമണത്തിന് പിന്നിൽ. ടിക്കറ്റില്ലാതെയുള്ള യാത്ര ചോദ്യം ചെയ്തതിനായിരുന്നു മര്ദ്ദനമെന്ന് വിക്രം കുമാര് മീണ പ്രതികരിച്ചു. അക്രമിയുടെ കയ്യിൽ ജനറല് ടിക്കറ്റ് മാത്രമാണ് ഉണ്ടായിരുന്നത്. സ്ലീപ്പര് കോച്ചില് ജനറല് ടിക്കറ്റുമായി ഇയാൾ കേറി. കോഴിക്കോടു നിന്നും ട്രെയിന് പുറപ്പെട്ടശേഷമാണ് ഇയാളെ ടിടിഇയുടെ ശ്രദ്ധയില്പ്പെടുന്നത്. മതിയായ ടിക്കറ്റ് ഇല്ലാത്തതിനാല് സ്ലീപ്പര് കോച്ചില് നിന്നും ഇറങ്ങാന് ആവശ്യപ്പെട്ടപ്പോള് യാത്രക്കാരന് മര്ദ്ദിക്കുകയായിരുന്നുവെന്ന് വിക്രം കുമാര് പറഞ്ഞു.
ട്രെയിനിൽ മറ്റു യാത്രക്കാര് നോക്കി നില്ക്കെയായിരുന്നു ടിടിഇക്കു നേരെ അക്രമം നടന്നത്. ടിടിഇയുടെ പരാതിയില് ഗുരുതര വകുപ്പുകള് ചുമത്തി കോഴിക്കോട് റെയില്വേ പൊലീസ് കേസ് രജിസ്റ്റർ ചെയ്തു.
Read Also: ആര് വീഴും? ആര് വാഴും? നാലാം ഘട്ട ലോക്സഭ വോട്ടെടുപ്പ് ഇന്ന്; ജനവിധി തേടുന്ന പ്രമുഖർ ഇവർ
