അധികാരത്തിന്റെ ‘അക്കാദമിക്’ ലീലാവിലാസങ്ങൾ; മിണ്ടാതിരുന്നാൽ കിട്ടുന്ന ‘സീറോ ടോളറൻസ്’! ‘ഇരയും അതിജീവിതയും അല്ല, ഞാൻ ആശ, അപമാനിച്ചത് കുഞ്ഞുമുഹമ്മദ്’
ലൈംഗികാതിക്രമ ആരോപണം ഉന്നയിച്ച് പേരും മുഖവും വെളിപ്പെടുത്തി തുറന്നുപറഞ്ഞ് ആശ ആച്ചി ജോസഫ് രംഗത്ത്.
നിർമ്മാതാവും സംവിധായകനും ഗുരുവായൂർ മുൻ എംഎൽഎയുമായ പി.ടി. കുഞ്ഞുമുഹമ്മദാണ് തനിക്കെതിരെ ലൈംഗികാതിക്രമം നടത്തിയതെന്ന് ആരോപിച്ചാണ് ആശ പ്രതികരണം നടത്തിയത്.
മലയാള മനോരമയിൽ പ്രസിദ്ധീകരിച്ച ലേഖനത്തിലൂടെയാണ് അവൾ അനുഭവം വിശദീകരിച്ചത്.
സംഭവം ഒറ്റപ്പെട്ട ഇടമോ നിഗൂഢ സാഹചര്യമോ അല്ലാതെ സർക്കാർ സ്ഥാപനമായ കേരള സംസ്ഥാന ചലച്ചിത്ര അക്കാദമിയുടെ ഔദ്യോഗിക ചുമതല നിർവഹിക്കുന്നതിനിടെയാണുണ്ടായതെന്ന് ആശ പറയുന്നു.
ഇത് തെറ്റിദ്ധാരണയല്ലെന്നും അധികാരബോധമുള്ള ഒരാളുടെ ബോധപൂർവമായ പ്രവൃത്തിയാണെന്നുമാണ് അവളുടെ ആരോപണം.
ലൈംഗികാതിക്രമം നേരിട്ട സ്ത്രീകളെ ‘ഇര’, ‘അതിജീവിത’ തുടങ്ങിയ പദങ്ങളിൽ ഒതുക്കുന്നത് വ്യക്തിത്വം തന്നെ മായ്ച്ചുകളയുന്നതുപോലെ തോന്നുന്നുവെന്നും സംരക്ഷണത്തിന്റെ പേരിൽ സ്ത്രീകൾ നിശ്ശബ്ദരാകരുതെന്നും അവൾ വ്യക്തമാക്കി.
സംഭവം കുടുംബത്തോട് പങ്കുവെക്കാൻ സമയം എടുത്തതായും മകളുടെ ആദ്യ ചോദ്യം പരാതി നൽകിയില്ലേയെന്നതായിരുന്നുവെന്നും ആശ പറഞ്ഞു.
നവംബർ 24ന് മുഖ്യമന്ത്രിക്ക് കത്ത് നൽകി വിവരം അറിയിച്ചതിനെ തുടർന്ന് നാല് ദിവസത്തിനകം വനിതാ പൊലീസ് ഉദ്യോഗസ്ഥർ മൊഴി രേഖപ്പെടുത്തി.
ഉടൻ എഫ്ഐആർ രജിസ്റ്റർ ചെയ്യുമെന്ന് അറിയിച്ചിരുന്നെങ്കിലും ഡിസംബർ 8ന് വാർത്ത പുറത്ത് വന്നപ്പോഴും കേസ് രജിസ്റ്റർ ചെയ്തിരുന്നില്ലെന്ന് അവൾ ചൂണ്ടിക്കാട്ടി.
ഇതിനിടെ അക്കാദമി ഭാരവാഹികൾ പ്രതിയെ അകറ്റിനിർത്തുമെന്നും ഐഎഫ്എഫ്കെയിൽ പങ്കെടുക്കാൻ അനുവദിക്കില്ലെന്നും ലൈംഗികാതിക്രമത്തിനെതിരെ ‘സീറോ ടോളറൻസ്’ പ്രഖ്യാപിക്കുമെന്നുമുള്ള ഉറപ്പുകൾ നൽകിയതായും ആശ പറയുന്നു.
ചിലർ നിശ്ശബ്ദത പാലിക്കണമെന്ന് ഉപദേശിച്ചതും തനിക്കിത് രണ്ടാമത്തെ അതിക്രമമായി തോന്നിയെന്നും അവൾ കൂട്ടിച്ചേർത്തു.
അരികുവൽക്കരിക്കപ്പെട്ട സ്ത്രീകൾ നേരിടുന്ന അതിക്രമങ്ങളെക്കുറിച്ച് സമൂഹം ഗൗരവത്തോടെ ചിന്തിക്കണമെന്നും പരാതി ഒത്തുതീർപ്പാകുന്ന പ്രവണതകൾ അവസാനിക്കണമെന്നും ആശ ആവശ്യപ്പെട്ടു.
തെളിവുകൾ സമർപ്പിക്കുന്നത് തന്റെ ബാധ്യതയല്ലെന്നും ഇത്തരം സംഭവങ്ങൾ തടയാനും നിയമപരമായി പരിഹരിക്കാനും ബാധ്യത അധികാരികളുടേതാണെന്നും അവൾ വ്യക്തമാക്കി.
ചരിത്രത്തിൽ നിന്ന് മായ്ച്ചുകളയപ്പെടാൻ തയാറല്ലെന്നും നിശ്ശബ്ദത ഒരിക്കലും പുരുഷാധിപത്യത്തെ തകർത്തിട്ടില്ലെന്നും ധൈര്യവും ധാർമിക വ്യക്തതയും മാത്രമാണ് മാറ്റങ്ങൾക്ക് വഴിയൊരുക്കുന്നതെന്നും ആശ പറഞ്ഞു.
സ്വന്തം ശബ്ദം മറ്റൊരു സ്ത്രീക്ക് സംസാരിക്കാനുള്ള ധൈര്യം നൽകുമെന്ന പ്രതീക്ഷയിലാണ് ഈ തുറന്നുപറച്ചിലെന്നും അവൾ ലേഖനം അവസാനിപ്പിക്കുന്നു.
English Summary:
Asha Achi Joseph publicly alleged sexual misconduct against filmmaker and former MLA P.T. Kunju Muhammed, revealing her identity in an article.
asha-achi-joseph-allegation-pt-kunju-muhammed
Asha Achi Joseph, P T Kunju Muhammed, Allegation, Sexual Harassment, Kerala, Film Academy, Women, News
