മാനന്തവാടി: മുനമ്പത്തിന് പിന്നാലെ മാനന്തവാടിയിലും വഖഫ് ഭൂമിയെന്ന അവകാശവാദവുമായി വഖഫ് ബോർഡ്. മാനന്തവാടി തവിഞ്ഞാൽ പഞ്ചായത്തിൽ തലപ്പുഴയിലെ 5.45 ഏക്കർ ഭൂമിയിലാണ് വഖഫ് ബോർഡ് അവകാശവാദം ഉന്നയിച്ചിരിക്കുന്നത്. 47/1, 48/1 എന്നീ സർവേ നമ്പറുകളിലുള്ള ഭൂമിയിൽ താമസിക്കുന്ന എട്ട് കുടുംബങ്ങളോട് അദാലത്തിൽ രേഖകൾ ഹാജരാക്കണമെന്നാവശ്യപ്പെട്ട് വഖഫ് ബോർഡ് നോട്ടീസ് നൽകി.
നിലവിൽ എട്ട് കുടുംബങ്ങൾക്കാണ് നോട്ടീസ് നൽകിയിരിക്കുന്നതെങ്കിലും കൂടുതൽ കക്ഷിച്ചേരലുകളുണ്ടായാൽ 20ഓളം കുടുംബങ്ങളാണ് ഒഴിയേണ്ടി വരിക. എതിർപ്പുകളുണ്ടെങ്കിൽ രേഖകൾ ഹാജരാക്കാൻ 14ാം തീയതി വരെയാണ് സമയം നൽകിയിരിക്കുന്നത്. 14ാം തീയതി രേഖകൾ ഹാജരാക്കുകയും 19ാം തീയതി അദാലത്തിൽ പങ്കെടുക്കുകയും വേണം. ഇതിൽ പങ്കെടുക്കാൻ സാധിച്ചില്ലെങ്കിൽ ഏകപക്ഷീയമായി വിധി പുറപ്പെടുവിച്ച് വഖഫ് ഭൂമി ഏറ്റെടുക്കുന്ന പ്രഖ്യാപനം വരുമെന്നാണ് നോട്ടീസിൽ ചൂണ്ടിക്കാട്ടുന്നത്.
വഖഫിന്റെ നോട്ടീസ് ശ്രദ്ധയിൽപ്പെട്ടിട്ടുണ്ടെന്ന് പഞ്ചായത്ത് പ്രസിഡന്റും പ്രതികരിച്ചു. പഞ്ചായത്ത് മെമ്പറും ഇക്കാര്യങ്ങൾ ശ്രദ്ധയിൽപ്പെട്ടിട്ടുണ്ടെന്ന് വ്യക്തമാക്കിയിട്ടുണ്ട്. എന്നാൽ ഏത് രീതിയിലുള്ള നടപടി സ്വീകരിക്കണമെന്ന രൂപരേഖ തയ്യാറാക്കാൻ പഞ്ചായത്തിനായിട്ടില്ല. കുറഞ്ഞ ദിവസം കൊണ്ട് രേഖകൾ വഖഫിന് മുമ്പാകെ എങ്ങനെ ഹാജരാക്കുമെന്ന ആശങ്കയിലാണ് ജനങ്ങൾ.
