2011ല്‍ പുറത്തിറങ്ങിയ ‘ആമേന്‍’ എന്ന ചിത്രത്തിലൂടെ മലയാളി പ്രേക്ഷകരുടെ പ്രിയങ്കരിയായി മാറിയ നടിയാണ് സ്വാതി റെഡ്ഡി. മലയാളമടക്കം നിരവധി ഭാഷകളിൽ താരം അഭിനയിച്ചു. ഇപ്പോഴിതാ പുതിയ ചിത്രമായ ‘മന്ത് ഓഫ് മധു’ വിന്റെ പ്രമോഷൻ പരിപാടിക്കിടെ മാധ്യമ പ്രവർത്തകന്റെ ചോദ്യത്തിന് സ്വാതി നൽകിയ മറുപടി വൈറലാണ്.

‘വിവാഹമോചിതയായോ?’ എന്ന മാധ്യമപ്രവർത്തകന്റെ ചോദ്യത്തിന് ‘മറുപടി പറയില്ല’ എന്നാണ് താരം പ്രതികരിച്ചത്. ആ ചോദ്യത്തിന് ഇവിടെ പ്രസക്തിയില്ലെന്നും, മറുപടി പറയില്ല എന്നതു തന്നെയാണ് ഉത്തരമെന്നും സ്വാതി റെഡ്ഡി പറഞ്ഞു. ‘‘ഞാൻ ഇതിൽ പ്രതികരണം തരില്ല. ഞാൻ എന്റെ കരിയർ ആരംഭിച്ചത് പതിനാറാം വയസ്സിലാണ്, അന്ന് സോഷ്യൽ മീഡിയ ഉണ്ടായിരുന്നെങ്കിൽ എങ്ങനെയായിരിക്കുമെന്ന് എനിക്കറിയില്ല. ചിലപ്പോൾ എന്നെ എയറിൽ കയറ്റിയേനെ. കാരണം എങ്ങനെ പെരുമാറണം എന്നു പോലും എനിക്ക് അന്ന് അറിയില്ലായിരുന്നു. പക്ഷേ ഇപ്പോൾ അങ്ങനെയല്ല”.

“ഒരു നടിയെന്ന നിലയിൽ എനിക്ക് ചില നിയമങ്ങൾ പാലിക്കേണ്ടതുണ്ട്. ചോദ്യം ഈ പരിപാടിയുമായി ബന്ധപ്പെട്ടതല്ലെന്ന് ഞാൻ കരുതുന്നു. എന്റെ സ്വകാര്യ ജീവിതത്തെക്കുറിച്ച് ഞാൻ ഒന്നും പറയില്ല. അതുകൊണ്ടുതന്നെ നിങ്ങളുടെ ചോദ്യത്തിന് ഞാൻ മറുപടി നൽകാൻ ആഗ്രഹിക്കുന്നില്ല.’’ താരം പറഞ്ഞു. സ്വാതിയുടെ ഭർത്താവ് വികാസ് മലേഷ്യന്‍ എയര്‍ലൈന്‍സിലെ പൈലറ്റാണ്. 2018 ഓഗസ്റ്റ് 30 ന് ഹൈദരാബാദില്‍ വച്ചായിരുന്നു ഇരുവരുടെയും വിവാഹം. 2005ല്‍ പുറത്തിറങ്ങിയ ഡെയ്ഞ്ചര്‍ എന്ന തെലുങ്ക് ചിത്രത്തിലൂടെയാണ് സ്വാതി സിനിമാരംഗത്ത് അരങ്ങേറ്റം കുറിക്കുന്നത്. പിന്നീട് 2008ല്‍ പുറത്തിറങ്ങിയ സുബ്രഹ്‌മണ്യപുരം എന്ന സിനിമയിലൂടെ നിരവധി ആരാധകരെ താരം നേടി. മലയാളത്തിലെ നോര്‍ത്ത് 24 കാതം എന്ന സിനിമയിലും നടി ഏറെ ശ്രദ്ധിക്കപ്പെട്ടിരുന്നു.

Also Read: മല്ലു ട്രാവലർ ലണ്ടനിൽ.പീഡനകേസിൽ ജാമ്യം ലഭിച്ചാൽ അടുത്തയാഴ്ച്ച നാട്ടില്‍ എത്തും.