‘കാവ്യയുമായുളള ബന്ധം മഞ്ജുവിനോട് പറഞ്ഞത് എന്തിനെന്ന് എന്നോട് ചോദിച്ചു’
കൊച്ചി: നടിയെ ആക്രമിച്ച കേസിൽ നിർണായക മൊഴികൾ പുറത്തുവന്നു. ബലാത്സംഗത്തിനിരയായ നടി വിചാരണ കോടതിയിൽ നൽകിയ മൊഴിയിലാണ് പ്രതികളോടും, പ്രത്യേകിച്ച് നടൻ ദിലീപിനോടും, ഉണ്ടായിരുന്ന ബന്ധത്തെക്കുറിച്ചുള്ള വിശദാംശങ്ങൾ വ്യക്തമാക്കുന്നത്.
ദിലീപ് തനോടു വിരോധം പുലർത്തുന്നുവെന്നും, ഈ വൈരാഗ്യം 2012 മുതൽ തുടങ്ങിയതാണെന്നും നടി മൊഴിയിൽ പറയുന്നു.
മഞ്ജുവുമായുള്ള തന്റെ വിവാഹബന്ധം തകർത്തത് താനാണെന്ന് ദിലീപ് പലരോടും പറഞ്ഞിരുന്നതായും നടി വ്യക്തമാക്കുന്നു.
കാവ്യ മാധവനുമായുള്ള ബന്ധം താനാണ് മഞ്ജുവിനോട് പറഞ്ഞതെന്നായിരുന്നു ദിലീപിന്റെ ആരോപണമെന്ന് മൊഴിയിലുണ്ട്.
2012-ലെ ലണ്ടൻ യാത്രയ്ക്കിടെ തന്നെ ദിലീപ് നേരിട്ട് ചോദ്യം ചെയ്തിട്ടുണ്ടെന്നും, ‘കാവ്യയുമായി ബന്ധപ്പെട്ട കാര്യങ്ങൾ മഞ്ജുവിനോട് പറഞ്ഞത് എന്തിന്’ എന്നാണ് ദിലീപ് ചോദിച്ചതെന്നും നടി പറയുന്നു.
തെളിവുകളുമായി മഞ്ജു തന്നെ എത്തിയതാണെന്ന് താൻ മറുപടി നൽകിയതായും മൊഴിയിലുണ്ട്.
സ്റ്റേജ് ഷോയുടെ റിഹേഴ്സലിനിടെ ദിലീപ് തനോടു സംസാരിക്കാറില്ലായിരുന്നുവെന്നും, പ്രശ്നം പരിഹരിക്കണമെന്ന് സിനിമാ മേഖലയിൽ ഉള്ളവർ പലരും പറഞ്ഞിരുന്നുവെന്നും നടി കോടതിയിൽ വ്യക്തമാക്കി.
കേസിൽ നാളെ വിധി വരാനിരിക്കെ വിചാരണ വേളയിലെ കൂടുതൽ വിവരങ്ങൾ പുറത്ത് വരുന്നതായാണ് റിപ്പോർട്ട്.
നടിയെ ബലാത്സംഗിക്കാനുള്ള ശ്രമം ഇതിന് മുമ്പും നടന്നിരുന്നുവെന്നും 2017-ൽ ഗോവയിൽ ഷൂട്ടിംഗ് സമയത്ത് ഒരിക്കൽ അതിനുള്ള ശ്രമമുണ്ടായിരുന്നുവെന്നും പക്ഷേ സംഭവം നടക്കാതിരുന്നുവെന്നും മൊഴികളിൽ പറയുന്നു.
2017 ജനുവരി 3-ന് നടിയെ എയർപോർട്ടിൽ നിന്ന് കൊണ്ടുപോയത് പൾസർ സുനിയായിരുന്നു.
തുടർന്ന് പല ദിവസങ്ങളിലും ഇയാൾ നടിയുടെ ഡ്രൈവറായി പ്രവർത്തിച്ചു. ബലാത്സംഗത്തിനായി വാഹനം കണ്ടെത്താൻ സുനി ജനുവരി 3-ന് സുനിൽ സെന്തിൽ കുമാർ എന്നയാളെ വിളിച്ചതായും പ്രോസിക്യൂഷൻ കോടതിയിൽ അറിയിച്ചു.
2017 ഫെബ്രുവരി 17-ന് കൊച്ചിയിൽ ഓടുന്ന വാഹനത്തിലാണ് നടി ആക്രമിക്കപ്പെട്ടത്. കേസിൽ ആകെ 12 പ്രതികളുണ്ടായിരുന്നു. ഒരാൾ മാപ്പുസാക്ഷിയാക്കിയതും രണ്ടുപേരെ കുറ്റപട്ടികയിൽ നിന്ന് ഒഴിവാക്കിയതും തുടർന്ന് പ്രതികളുടെ എണ്ണം ഒമ്പതായി.
പൾസർ സുനിയാണ് ഒന്നാം പ്രതി. നടൻ ദിലീപ് എട്ടാം പ്രതിയാണ്. ആദ്യം പ്രതിയാക്കിയിരുന്നില്ലെങ്കിലും, തെളിവുകളുടെ അടിസ്ഥാനത്തിൽ 2017 ജൂലൈ 10-ന് ദിലീപിനെ അറസ്റ്റ് ചെയ്തു.
85 ദിവസം ജയിൽവാസത്തിന് ശേഷം 2017 ഒക്ടോബർ 3-ന് ദിലീപിന് ജാമ്യം ലഭിച്ചു.
English Summary
Key court testimonies in the 2017 Kerala actress assault case have surfaced. The survivor stated in court that actor Dileep had personal enmity toward her since 2012, believing she was responsible for breaking his marriage with Manju Warrier and for revealing his alleged relationship with Kavya Madhavan. She testified that Dileep confronted her during a London trip in 2012. The court also heard that an earlier attempt to assault her had been planned during a film shoot in Goa in 2017 but did not occur. Pulsar Suni allegedly followed her as a driver before the February 17, 2017 assault in Kochi. Out of 12 accused, 9 remain in the case, with Dileep as the 8th accused. The verdict is expected tomorrow.
actress-assault-case-new-testimony-dileep-enmity
Kerala, Actress Assault Case, Dileep, Pulsar Suni, Crime, Court Testimony, Kochi, Manju Warrier, Kavya Madhavan, Kerala High Court
