താര വിവാഹങ്ങൾ എന്നും സമൂഹ മാധ്യമങ്ങളിലെ ചർച്ചാ വിഷയങ്ങളാണ്. അവിവാഹിതരും വിവാഹ മോചിതരുമായ താരങ്ങളെ കുറിച്ച് പലതരത്തിലുള്ള ഗോസിപ്പുകളും പരക്കാറുണ്ട്. നിരവധി പ്രചരണങ്ങൾക്ക് ഒടുവിൽ നടി അമല പോൾ വിവാഹിതയാകുന്നുവെന്ന വാർത്തയാണ് ഇപ്പോൾ പുറത്തു വന്നിരിക്കുന്നത്. സുഹൃത്തായ ജഗദ് ദേശായി ആണ് അമലയുടെ വരൻ. നടിയെ പ്രപ്പോസ് ചെയ്യുന്ന വിഡിയോ പങ്കുവച്ച് ജഗദ് തന്നെയാണ് ഇക്കാര്യം വെളിപ്പെടുത്തിയത്. ‘‘മൈ ജിപ്സി ക്വീൻ യെസ് പറഞ്ഞു’’ എന്ന അടിക്കുറിപ്പോടു കൂടിയാണ് വീഡിയോ പങ്കുവെച്ചിരിക്കുന്നത്.
ഹോട്ടലിൽ ഇരുവരും ഭക്ഷണം കഴിക്കാൻ ഇരിക്കുന്നതിനിടെയാണ് ജഗദ് നടിയെ പ്രപ്പോസ് ചെയ്യുന്നത്. നൃത്തം ചെയ്യുന്നതിനിടയിൽ മോതിരവുമായി അമലയെ പ്രപ്പോസ് ചെയ്യുന്നത് വിഡിയോയിൽ കാണാം. അമല സന്തോഷത്തോടെ മോതിരം സ്വീകരിക്കുന്നതും ജഗദിന് സ്നേഹ ചുംബനം നൽകുന്നുമുണ്ട്. വെഡിങ് ബെൽസ് എന്ന ഹാഷ്ടാഗും വിഡിയോയിൽ ഉൾപ്പെടുത്തിയിട്ടുണ്ട്. പ്രപ്പോസല്‍ വീഡിയോ ഇതിനോടകം തന്നെ സമൂഹ മാധ്യമങ്ങളിൽ വൈറലാണ്. താരങ്ങൾ അടക്കം നിരവധിപേരാണ് അമല പോളിന് ആശംസകളുമായി എത്തുന്നത്. അതേസമയം, വിവാഹത്തിന്റെ മറ്റു വിവരങ്ങളൊന്നും ജഗദ് വെളിപ്പെടുത്തിയിട്ടില്ല.
നടിയുടെ രണ്ടാം വിവാഹമാണിത്. 2014–ലായിരുന്നു സംവിധായകൻ എ എൽ വിജയുമായുള്ള അമലയുടെ ആദ്യ വിവാഹം. നാല് വർഷത്തെ പ്രണയത്തിനു ശേഷമായിരുന്നു ഇരുവരും വിവാഹിതരായത്. എന്നാൽ, 2017ൽ ഇവർ വിവാഹമോചിതരായി. ആരാധകരെ ഒന്നടങ്കം ഞെട്ടിച്ച വിവാഹമോചനമായിരുന്നു ഇത്. പിന്നീട് ഗായകനും മുംബൈ സ്വദേശിയുമായ ഭവ്നിന്ദർ സിങുമായി താരം ലിവിങ് റിലേഷനിലായിരുന്നു. ഇരുവരും വിവാഹിതരായി എന്ന രീതിയിൽ വാർത്തകളും ചിത്രങ്ങളും വ്യാപകമായി പ്രചരിക്കുകയും ചെയ്തു. എന്നാൽ, തെറ്റായ ചിത്രങ്ങൾ പ്രചരിപ്പിച്ച്, അനുമതി ഇല്ലാതെ തെറ്റിദ്ധാരണ സൃഷ്ടിക്കാന്‍ ഭവ്നിന്ദർ ശ്രമിച്ചെന്നായിരുന്നു അമലയുടെ പ്രതികരണം. പൃഥ്വിരാജിനെ നായകനാക്കി ബ്ലെസി സംവിധാനം ചെയ്യുന്ന ആടുജീവിതമാണ് അമലയുടെ പുതിയ ചിത്രം.
Read Also:കാമുകന്‍മാരെല്ലാം കയ്യൊഴിയുകയാണെന്ന് കങ്കണ: പക്ഷേ അഞ്ച് വര്‍ഷത്തിനുള്ളില്‍ അത് സംഭവിക്കും
