ചെന്നൈ: റമദാൻ വ്രതമെടുത്ത് ഇഫ്താർ വിരുന്ന് ഒരുക്കി നടനും രാഷ്‌ട്രീയ നേതാവുമായ വിജയ്. റമദാൻ മാസത്തിലെ ആദ്യ വെള്ളിയാഴ്ചയായ ഇന്നാണ് ചെന്നൈയിൽ ഇഫ്താർ വിരുന്ന് സംഘടിപ്പിച്ചത്. ഒരു ദിവസത്തെ റംസാന്‍ വ്രതം അനുഷ്ടിച്ച അദ്ദേഹം പ്രാര്‍ഥനയിലും പങ്കെടുത്തു.
വിശ്വാസികൾക്കൊപ്പം തൊപ്പി ധരിച്ച് തൂവെള്ള വസ്ത്രധാരി പ്രാർഥനയിൽ പങ്കെടുക്കുന്ന ചിത്രങ്ങളും വിഡിയോയും വൈറലാണ്. സാധാരണക്കാരടക്കം 3000ത്തോളം ആളുകള്‍ വിരുന്നില്‍ പങ്കെടുത്തതായാണ് പുറത്തു വരുന്ന റിപ്പോർട്ടുകൾ. 15 ഓളം പള്ളികളിലെ ഇമാമുമാര്‍ക്ക് ചടങ്ങിലേക്ക് ക്ഷണിച്ചിരുന്നു.
ചെന്നൈ വൈഎംസിഎ ഗ്രൗണ്ടിലാണ് ഇഫ്താർ സംഘടിപ്പിച്ചത്. ക്ഷണം സ്വീകരിച്ചെത്തിയ എല്ലാവർക്കും വിജയ് നന്ദി പറഞ്ഞു. ഇഫ്താർ വിരുന്നിന്റെ വീഡിയോകളും ചിത്രങ്ങളും സോഷ്യൽ മീഡിയയിൽ വ്യാപകമായി പ്രചരിച്ചിട്ടുണ്ട്.
