കോട്ടയ്ക്കല്: വാഹനാപകടത്തിനിടെ എയര്ബാഗ് മുഖത്തമര്ന്നതിനെത്തുടര്ന്ന് രണ്ടു വയസുകാരി മരിച്ചു. പൊന്മള ചാപ്പനങ്ങാടി തെക്കത്ത് നസീറിന്റെയും റംഷീനയുടേയും മകള് ഇഫയാണ് മരിച്ചത്.A two-year-old girl died after the airbag hit her face during a car accident
കാറും ടാങ്കര്ലോറിയും കൂട്ടിയിടിച്ചുണ്ടായ അപകടത്തിനിടെ അമ്മയുടെ മടിയിലിരുന്ന രണ്ടു വയസ്സുകാരി എയര്ബാഗ് മുഖത്തമര്ന്നതിനെത്തുടര്ന്ന് ശ്വാസംമുട്ടി മരിക്കുകയായിരുന്നു.
ശനിയാഴ്ച ഉച്ചയ്ക്ക് മൂന്നുമണിക്ക് ആയിരുന്നു അപകടം. പടപ്പറമ്പ് പുളിവെട്ടിയില് കുഞ്ഞും കുടുംബവും സഞ്ചരിച്ച കാറും എതിരെ വന്ന ടാങ്കര് ലോറിയും കൂട്ടിയിടിക്കുകയായിരുന്നു.
മാതാവിന്റെ മടിയിലിയിരുന്ന കുട്ടി എയര് ബാഗ് മുഖത്തമര്ന്നും സീറ്റ് ബെല്റ്റ് കഴുത്തില് കുരുങ്ങിയും ശ്വാസംമുട്ടി മരിക്കുകയായിരുന്നു.
കുട്ടിയുടെ പിതാവ് രണ്ടുദിവസം മുന്പാണ് വിദേശത്തുനിന്ന് വന്നത്. കുട്ടിയുടെ പിതൃസഹോദരന്റെ വിവാഹം ഞായറാഴ്ച നടക്കാനിരിക്കെയാണ് അപകടം. അപകടത്തില് മറ്റാര്ക്കും പരിക്കില്ല. റൈഹാന്, അമീന് എന്നിവരാണ് സഹോദരങ്ങൾ.
കൊളത്തൂര് പോലീസ് എത്തി നടപടികള് സ്വീകരിച്ചു. കുട്ടിയുടെ മൃതദേഹം പടപ്പറമ്പ് ആശുപത്രിയില് നിന്ന് പെരിന്തല്മണ്ണ ജില്ലാ ആശുപത്രി മോര്ച്ചറിയില് സൂക്ഷിച്ചിരിക്കുകയാണ്. ഞായറാഴ്ച രാവിലെ മൃതദേഹം വീട്ടിലെത്തിക്കും. പതിനൊന്നുമണിക്ക് പറങ്കിമൂച്ചിക്കല് മസ്ജിദ് കബറിസ്താനില് കബറടക്കും.”
