അവയവങ്ങളുടെ ദൗർലഭ്യം ലോകമെമ്പാടുമുള്ള ഒരു വിട്ടുമാറാത്ത പ്രശ്നമാണ്. എന്നാൽ, വൈദ്യശാസ്ത്രത്തിനിത് ചരിത്ര മുഹൂർത്തം. ലോകത്ത് ആദ്യമായി ജീവനുള്ള മനുഷ്യനിൽ പന്നിയുടെ വൃക്ക വെച്ചുപിടിപ്പിച്ചു. അമേരിക്കയിലെ മസാചുസെറ്റ്സ് ജനറൽ ആശുപത്രിയിൽ കഴിഞ്ഞ ശനിയാഴ്ചയാണ് 62-കാരനായ റിച്ചാർഡ് സ്ലേമാനിൽ നാല് മണിക്കൂർ നീണ്ടു നിന്ന ശസ്ത്രക്രിയ നടന്നത്. ശസ്ത്രക്രിയയ്ക്ക് ശേഷം അദ്ദേഹം സുഖം പ്രാപിച്ചു വരികയാണെന്നും ഉടൻ ആശുപത്രി വിടുമെന്നും അധികൃതർ അറിയിച്ചു. പന്നിയുടെ വൃക്ക മനുഷ്യ ശരീരം തിരസ്കരിക്കാതിരിക്കാനുള്ള പ്രതിരോധശേഷി കുറയ്ക്കുന്ന മരുന്നുകളാണ് ഇപ്പോൾ അദ്ദേഹത്തിന് നൽകുന്നത്. മനുഷ്യ ശരീരത്തിൽ വെച്ചുപിടിപ്പിക്കാനുള്ള പന്നിയുടെ വൃക്കയിൽ നിന്നും അപകടകരമായ ജീനുകൾ നീക്കം ചെയ്ത് മനുഷ്യജീനുകൾ ചേർക്കുന്നതിനായി ജനിതക എഡിറ്റ് ചെയ്തിരുന്നുവെന്നു ഡോക്ടർമാർ പറഞ്ഞു.
ഒരു സ്പീഷീസിൽ നിന്ന് മറ്റൊരു സ്പീഷീസിലേക്ക് അവയവം ദാനം ചെയ്യുന്ന രീതിയെ ക്സെനോട്രാൻസ്പ്ലാന്റേഷൻ എന്നാണ് വിളിക്കുന്നത്. മുൻപ് മസ്തിഷ്ക മരണം സംഭവിച്ച രോഗികളിലേക്ക് പന്നിയുടെ വൃക്കകൾ മാറ്റി വച്ചിരുന്നു എന്നാൽ ജീവിച്ചിരിക്കുന്ന മനുഷ്യനിൽ ആദ്യമായാണ് ഈ പരീക്ഷണം നടത്തുന്നത്. ടൈപ്പ് 2 പ്രമേഹവും ഹൈപ്പർടെൻഷനുമുള്ള വ്യക്തിയാണ് റിച്ചാർഡ്. ഇദ്ദേഹത്തിന് 2018 ഒരു തവണ വൃക്കമാറ്റിവെക്കൽ ശസ്ത്രക്രിയ നടന്നിരുന്നു. എന്നാൽ അടുത്തിടെ വീണ്ടും വൃക്കകളുടെ പ്രവർത്തനം തകകരാറിലായതോടെയാണ് ശസ്ത്രക്രിയ നടത്താൻ തീരുമാനിച്ചത്.
നേരത്തേ പന്നിയുടെ ഹൃദയം മനുഷ്യരില് വെച്ചുപിടിപ്പിച്ച വാർത്ത പുറത്തുവന്നിരുന്നു. അമേരിക്കയിൽ തന്നെയാണ് ഇതും നടന്നത്. പക്ഷേ ഇവര് രണ്ടുമാസങ്ങൾക്കുള്ളിൽ മരണപ്പെട്ടിരുന്നു. മൃഗങ്ങളുടെ അവയവങ്ങള് മനുഷ്യശരീരം ഓപൂര്ണമായും തിരസ്കരിക്കുന്നതാണ് ഇത്തരം ശസ്ടത്ര ക്രിയകൾ പരാജയപ്പെടാനുള്ള കാരണം. എന്നാൽ, ഇപ്പോൾ ഇത് വിജയകരമായി പൂർത്തിയാക്കിയതോടെ ലോകമെമ്പാടുമുള്ള ദശലക്ഷക്കണക്കിന് വൃക്ക രോഗികൾക്ക് ഇതൊരു പ്രതീക്ഷയാകുമെന്നു ഡോക്ടർമാർ പറഞ്ഞു.
