ഇടുക്കിയിൽ ലോഡുമായെത്തിയ ടോറസ് ലോറി വീടിന് മുകളിലേക്ക് മറിഞ്ഞു
ഇടുക്കി നെടുങ്കണ്ടത്ത് തമിഴ്നാട്ടിൽ നിന്നും ലോഡുമായി എത്തിയ ടോറസ് ലോറി വീടിന് മുകളിലേക്ക് മറിഞ്ഞ് അപകടം. താന്നിമൂട് സ്വദേശി അബ്ദുൽ റസാക്കിന്റെ വീടിന് മുകളിലേക്ക് ആണ് ലോറി മറിഞ്ഞത്.
വീട്ടിൽ ഉണ്ടായിരുന്നവർ രക്ഷപ്പെട്ടത് തലനാരിഴക്ക്. വെള്ളിയാഴ്ച രാവിലെ പത്തരയോടെ ആയിരുന്നു അപകടം.
റോഡ് പണിക്കായി തമിഴ്നാട്ടിൽ നിന്നും മെറ്റിൽ കയറ്റി എത്തിയ ലോറി കയറ്റത്തിൽ നിയന്ത്രണം വിട്ടു പുറകോട്ട് ഉരുളുകയായിരുന്നു.
വീട് പൂർണമായും തകർന്നു. 12 ലക്ഷത്തിലധികം രൂപയുടെ നഷ്ടം ഉള്ളതായി വീട്ടുടമ പറയുന്നു. ലോറി ഓടിച്ച ഡ്രൈവർക്ക് നിസാര പരിക്കുണ്ട്.
കുളിക്കുന്നതിനിടയിൽ മുങ്ങിതാഴ്ന്ന വിനോദ സഞ്ചാരിയെ ലൈഫ്ഗാർഡുകൾ രക്ഷപ്പെടുത്തി
കോവളം കടലിൽ ശക്തമായ അടിയൊഴുക്കുണ്ടാകുന്ന പ്രതിഭാസം തുടരുന്നു. കടലിൽ കുളിക്കാനിറങ്ങുന്നവർ ്അടിയൊഴുക്കിൽപ്പെട്ട് മുങ്ങിതാഴുന്ന സംഭവങ്ങളും തുടരുന്നു.
വെളളിയാഴ്ച വൈകിട്ട നാലോടെ ലൈറ്റ് ഹൗസ് ബീച്ചിൽ കുളിക്കാനിറങ്ങിയ റഷ്യൻ വിനോദ സഞ്ചാരി ആന്ത്രേയും ശക്തമായ അടിയൊഴുക്കിൽപ്പെട്ട് കടലിൽ മുങ്ങിതാഴ്ന്നുപോയി.
കൈയുയർത്തി സഹായം അഭ്യർഥിച്ച സഞ്ചാരിയെ ബീച്ചിലുണ്ടായിരുന്ന ലൈഫ്ഗാർഡ് സൂപ്പർവൈസർ സുന്ദരേശൻ, അഖിൽ എം.നായർ, ജി ഷാജി എന്നിവർ നീന്തിയെത്തി ആളെ രക്ഷപ്പെടുത്തി കരയിലെത്തിച്ചു.
ഇദ്ദേഹത്തിന് ആവശ്യമായ പ്രഥമ ശുശ്രൂഷയും നൽകിയിരുന്നു.കഴിഞ്ഞ രണ്ടാഴ്ചക്കുളളിൽ പത്തിലധികം പേരാണ് ലൈറ്റ് ഹൗസ് ബീച്ചിൽ കുളിക്കുന്നതിനിടയിൽ അടിയൊഴുക്കിൽപ്പെട്ട് മുങ്ങിതാഴ്ന്നതെന്ന് ലൈഫ് ഗാർഡുകൾ പറഞ്ഞു.
