തിരുവനന്തപുരം: ബിവറേജസ് കോർപറേഷൻ ഷോപ്പുകളിൽ ബ്രാൻഡിയുടെ സ്റ്റോക്ക് ക്ലിയറൻസ് വിൽപ്പന. ബ്ലു ഓഷ്യൻ ബിവറേജസ് എന്ന കമ്പനിയാണ് ചില ബ്രാൻഡുകൾ നിർത്തുന്നതിന്റെ ഭാഗമായി വില പകുതിയായി കുറച്ചത്.
1310 രൂപയ്ക്കു വിറ്റിരുന്ന കുപ്പിയുടെ വില 650 രൂപയാക്കി. സ്റ്റോക്ക് എത്രയും വേഗം വിറ്റു തീർക്കുകയാണ് ലക്ഷ്യം.
സർക്കാരിനുള്ള നികുതി, ബെവ്കോയുടെ കമ്മീഷൻ എന്നിവയിൽ കുറവു വരില്ല. വില കുറയ്ക്കുന്നതിന്റെ നഷ്ടം കമ്പനിക്കു മാത്രം.
അതേസമയം ക്യൂവിൽ ആളുണ്ടെങ്കിൽ രാത്രി ഒൻപത് മണി കഴിഞ്ഞാലും ഔട്ട്ലെറ്റുകളിൽ മദ്യവിൽപന തുടരണമെന്ന ഉത്തരവ് പിൻവലിച്ചു. അസിസ്റ്റന്റ് ജനറൽ മാനേജർ ടി. മീനാകുമാരിയാണ് ഉത്തരവ് പുറത്തിറക്കിയത്.
വെള്ളിയാഴ്ച പുറത്തുവന്ന ഉത്തരവിലെ കാര്യങ്ങൾ അന്നുതന്നെ പ്രാബല്യത്തിൽ വന്നിരുന്നു. ഉത്തരവ് വിവാദമായതോടെ പിൻവലിക്കുകയും ചെയ്തു.
രാവിലെ 10 മണിമുതൽ രാത്രി ഒൻപത് മണിവരെയാണ് ബെവ്കോയുടെ പ്രവൃത്തിസമയം. സാധാരണമായി ഒൻപത് മണിക്ക് ഷോപ്പുകൾ അടയ്ക്കാറുണ്ട്.
ഇനി അങ്ങനെ പാടില്ലെന്നാണ് വെള്ളിയാഴ്ച പുറത്തിറങ്ങിയ ഉത്തരവിൽ പറയുന്നത്. രാത്രി ഒൻപത് മണിക്ക് ക്യൂവിൽ ആളുണ്ടെങ്കിൽ അവർക്കെല്ലാം മദ്യം നൽകുന്നത് ഉറപ്പാക്കണമെന്നാണ് ഉത്തരവിൽ പറയുന്നത്.
