കൊച്ചി: കൊച്ചിയിൽ സിനിമ ചിത്രീകരണത്തിനായി വസ്തുക്കൾ കൊണ്ടുവന്ന വാനിനു തീപിടിച്ചു. എറണാകുളം സരിത തിയറ്ററിന് മുന്നിൽ നിർത്തിയിട്ടിരുന്ന വാനിലാണ് തീപടർന്നത്. ശനിയാഴ്ച ഉച്ചയോടെയാണ് സംഭവം..
ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. ‘ആശാൻ’ എന്ന സിനിമയുടെ ഷൂട്ടിങ് പുരോഗമിക്കുന്നതിനിടയിലായിരുന്നു തീപിടുത്തം ഉണ്ടായത്. അപകടത്തെ തുടർന്ന് കുറച്ചു സമയം ഷൂട്ടിങ് നിർത്തിവച്ചു.
അപകടത്തിൽ ആർക്കും പരുക്കില്ലെന്നും ലക്ഷക്കണക്കിന് രൂപയുടെ സാധനങ്ങൾ കത്തി നശിച്ചതായും അധികൃതർ അറിയിച്ചു. അഗ്നിശമന സേനാംഗങ്ങള് എത്തിയാണ് തീ അണച്ചത്.
