ആലപ്പുഴ: സിപിഐഎം വിട്ട് ബിജെപിയില്‍ ചേര്‍ന്ന ബിപിന്‍ സി ബാബുവിനെതിരെ ഗാർഹിക പീഡനത്തിന് കേസെടുത്ത് പോലീസ്. ഭാര്യ മിനീസയുടെ പരാതിയിലാണ് കായംകുളം കരീലക്കുളങ്ങര പോലീസ് കേസെടുത്തത്. 10 ലക്ഷം രൂപ സ്ത്രീധനം വാങ്ങിയ ശേഷം കൂടുതല്‍ സ്ത്രീധനം ചോദിച്ച് ഉപദ്രവിച്ചു, ഭീഷണിപ്പെടുത്തി, ശാരീരിക പീഡനം തുടങ്ങിയവയാണ് പരാതിയിൽ ഉന്നയിക്കുന്ന ആരോപണങ്ങൾ.(Police registered case against Bipin C Babu on his wife’s complaint)
കേസിൽ സിപിഐഎം കായംകുളം ഏരിയാ കമ്മിറ്റി അംഗമായ അമ്മ പ്രസന്ന കുമാരി രണ്ടാം പ്രതിയാണ്. മഹിളാ അസോസിയേഷന്‍ ജില്ലാ നേതാവായ ഭാര്യയുമായി ബിപിൻ പിരിഞ്ഞുകഴിയുകയാണ്. നേരത്തെ ബിപിന്‍ സി ബാബു സിപിഐഎം വിട്ട് ബിജെപിയില്‍ ചേര്‍ന്നതില്‍ പ്രവര്‍ത്തകര്‍ക്കൊപ്പം ഭാര്യ കേക്ക് മുറിച്ച് ആഘോഷം നടത്തിയിരുന്നു.
സിപിഐഎമ്മിന്റെ മതനിരപേക്ഷ സ്വഭാവം നഷ്ടപ്പെട്ടുവെന്നാരോപിച്ചാണ് ബിപിന്‍ സി ബാബു കഴിഞ്ഞ ദിവസം പാര്‍ട്ടി വിട്ട് ബിജെപിയില്‍ ചേര്‍ന്നത്.
