തിരുവനന്തപുരം: സംസ്ഥാനത്ത് ഓടുന്ന എട്ടു കോച്ചുള്ള വന്ദേഭാരതിനുപകരം 20 കോച്ചുള്ളവ വരുന്നു. ആലപ്പുഴ വഴി ഓടുന്ന തിരുവനന്തപുരം-മംഗളുരു-തിരുവനന്തപുരം (20631/20632) വന്ദേഭാരത് എക്സ്പ്രസിന് പകരമാണ് പുതിയ ട്രെയിൻ ഓടുക.
റെയില്വേ കണക്കു പ്രകാരം ഇന്ത്യയില് ഒക്കുപ്പൻസി 200 ശതമാനത്തിനടുത്തുള്ള ട്രെയിനാണ് ഇത്. 100 സീറ്റുള്ള ട്രെയിനിൽ കയറിയും ഇറങ്ങിയും 200 യാത്രക്കാർ വരെ സീറ്റ് ഉപയോഗിക്കുന്നുവെന്നാണ് കണക്ക്.
മംഗളൂരു-തിരുവനന്തപുരം വണ്ടിയിലെ(20631) 474 സീറ്റുകൾ മുഴുവൻ യാത്രക്കാരുമായാണ് ഓടുന്നത്.
20 റേക്കാകുന്നതോടെ 1246 സീറ്റിലധികം ഉണ്ടാകും. 20 കോച്ചുള്ള വന്ദേഭാരതുകള് അടുത്തിടെയാണ് റെയില്വേ പുറത്തിറക്കിയത്.
പുതിയതായി ചെന്നൈ ഇന്റഗ്രല് കോച്ച് ഫാക്ടറിയില് നിന്നിറങ്ങിയ രണ്ട് വന്ദേഭാരത് കയിനുകൾ ദക്ഷിണ റെയില്വേക്ക് കൈമാറി.
നിലവില് എട്ടു റേക്കില് ഓടുന്ന തിരുവനന്തപുരം-മംഗളൂരു, തിരുനെല്വേലി- ചെന്നൈ വന്ദേഭാരതുകള്ക്കാണ് മുൻഗണന.
16 കോച്ചുള്ള തിരുവനന്തപുരം-കാസർകോട് വന്ദേഭാരതിലെ (20634) 1016 സീറ്റുകളും എപ്പോഴും നിറയെ യാത്രക്കാരുമായാണ് ഓടുന്നത്. ഇന്ത്യൻറെയില്വേയുടെ കണക്കനുസരിച്ച് 100 ശതമാനം ഒക്കുപ്പൻസിയുള്ള 17 വണ്ടികളില് ഏറ്റവും മുന്നിലാണ് ഈ വണ്ടി.
വന്ദേഭാരതിന്റെ നീലയും വെള്ളയും നിറം ഒഴിവാക്കിയിട്ടുണ്ട്. ഓറഞ്ച്, കറുപ്പ്, ചാരനിറം എന്നിവയുടെ സംയോജനത്തോടെയുള്ള നിറത്തിലാണ് ഇപ്പോൾ ഇറക്കുന്നത്. ഐ.സി.എഫ് റെയില്വേയുടെ അനുമതിയോടെ നിറംമാറ്റിയത്.
