കൊച്ചി: കുറുവ സംഘത്തിലെ പ്രതികൾക്കായി അന്വേഷണം നടത്തുന്നതിനിടെ സംശയസ്പദമായ സാഹചര്യത്തിൽ മൂർച്ചയേറിയ ആയുധങ്ങളുമായി റോന്തുചുറ്റിയ ഒരാളെ പിടികൂടി. എറണാകുളം പറവൂരിൽ നിന്നുമാണ് ഇയാളെ പിടികൂടിയത്.
നാട്ടുകാർ പോലീസിനെ വിവരം അറിയിച്ചതിനെത്തുടർന്നാണ് തമിഴ്നാട് സ്വദേശിയായ സുരേഷിനെ അറസ്റ്റ് ചെയ്തത്. ഇയാളോടൊപ്പം മറ്റൊരാൾകൂടി ഉണ്ടായിരുന്നതായും കൈവശം മൂർച്ചയേറിയ ആയുധങ്ങളുണ്ടായിരുന്നുവെന്നും നാട്ടുകാർ പറഞ്ഞു.
വടക്കൻ പറവൂരിലും ചേന്ദമംഗലത്തും കവർച്ചസംഘം വ്യാപകമായതിനാൽ സുരക്ഷയും നിരീക്ഷണവും ശക്തമാക്കിയിട്ടുണ്ട്. കുറുവ സംഘത്തിലുണ്ടായിരുന്ന സന്തോഷിനെ കഴിഞ്ഞ ദിവസം പൊലീസ് പിടികൂടിയിരുന്നു.
കുറുവ മോഷണ സംഘത്തിലെ മറ്റു പ്രതികള്‍ക്കായി പൊലീസ് അന്വേഷണം വ്യാപിപ്പിച്ചതിനിടെയാണ് സംശയകരമായ സാഹചര്യത്തിൽ ഒരാളെ പൊലീസ് പിടികൂടിയത്. ഇതുസംബന്ധിച്ച കൂടുതൽ വിവരങ്ങള്‍ പൊലീസ് പുറത്തുവിട്ടിട്ടില്ല.
