തിരുവനന്തപുരം: ഇന്ത്യയിൽ ആദ്യ വാഹനാപകട മരണം നടന്നിട്ട് 110 വർഷം തികയുന്നു. നമ്മുടെ കേരളത്തിലാണ് രാജ്യത്ത് ആദ്യത്തെ വാഹനാപകടം നടന്നത്. It has been 110 years since the first road accident death in India
കാളിദാസ കൃതികൾ മലയാളത്തിലേക്ക് വിവർത്തനം ചെയ്ത കേരള കാളിദാസൻ എന്നറിയപ്പെട്ടിരുന്ന കേരളവർമ്മ വലിയ കോയിത്തമ്പുരാനാണ് രാജ്യത്തെ ആദ്യ വാഹനാപകടത്തിൽ മരിച്ച വ്യക്തി.
1914 സെപ്റ്റംബർ 20ന് മാവേലിക്കര കുറ്റിത്തെരുവിൽ വെച്ചായിരുന്നു അപകടം. വൈക്കത്തുനിന്ന് തിരുവനന്തപുരത്തേക്കുള്ള യാത്രയ്ക്കിടെയാണ് അപകടം നടന്നത്.
ഒപ്പം ശിഷ്യനും മരുമകനുമായ കേരളപാണിനി എ ആർ രാജരാജവർമ്മയും ഉണ്ടായിരുന്നു. പക്ഷെ അദ്ദേഹം അത്ഭുതകരമായി രക്ഷപെട്ടു. മോട്ടോർ വാഹന വകുപ്പിന്റെ ഫേസ്ബുക്ക് പോസ്റ്റിലെ ഓർമ്മപ്പെടുത്തലാണിത്.
യുഎസ് നാഷണൽ സേഫ്റ്റി കൗൺസിലിന്റെ കണക്ക് പ്രകാരം1908ൽ അമേരിക്കയിൽ നിരത്തിൽ കൊല്ലപ്പെട്ട ആളുകളുെടെ എണ്ണം 751 ആയിരുന്നു. അതേ വർഷമാണ് ഹെൻട്രി ഫോർഡ് അസംബ്ലിലൈൻ പ്രിൻസിപ്പൽ പ്രാവർത്തികമാക്കിക്കൊണ്ട് സാധാരണക്കാരന് താങ്ങാവുന്ന വിലയ്ക്ക് കാർ വിപ്ലവം തീർക്കുന്നത്.
പിന്നെയുള്ള രണ്ടു പതിറ്റാണ്ട് കൊണ്ട് 15 മില്യണിലധികം ഫോർഡ് ടി വാഹനങ്ങൾ മാത്രം നിരത്തിലിറങ്ങി. 1935 ആയപ്പോൾ അമേരിക്കയിൽ റോഡ് അപകടത്തിൽ കൊല്ലപ്പെട്ടവരുടെ എണ്ണം 37000 ആയി വർധിച്ചു. എന്നാൽ 2020ൽ അമേരിക്കയിൽ നിരത്തിൽ കൊല്ലപ്പെട്ടവർ 36560 പേർ മാത്രമാണ്.
ഇന്ത്യയിൽ ഒരാൾ പോലും വാഹനാപകടത്തിൽ മരിക്കാതിരുന്ന വർഷമാണ് 1908 എന്നത് അതിശയകരമായ കാര്യമാണ്. എന്നാൽ 2020ൽ മാത്രം കൊല്ലപ്പെട്ടത് 151470 പേരാണ് .
എത്ര ഭീതിതമായ ഒരു വർധനവാണ് ഇന്ത്യയിൽ നടന്നുകൊണ്ടിരിക്കുന്നത്.1970 കളോട് കൂടിത്തന്നെ മിക്ക വികസിത രാജ്യങ്ങളിലും റോഡ് അപകടം മൂലമുള്ള മരണനിരക്ക് കുറയാൻ തുടങ്ങി.
പക്ഷെ ഇന്ത്യയിൽ മാത്രമാണ് റോഡ് സുരക്ഷയോടുള്ള നിസംഗത. അതുകൊണ്ടുതന്നെ മരണനിരക്ക് വർധിച്ചുകൊണ്ടിരിക്കുന്നു.
