ഭാര്യയെ സംശയം; ദേഷ്യം തീർക്കാൻ വീടിന് തീയിട്ട് ഭർത്താവ്, ഭാര്യയും മകനും പൊള്ളലേറ്റ് ചികിത്സയിൽ
പത്തനംതിട്ട: പത്തനംതിട്ടയിൽ ഭാര്യയോടുള്ള സംശയം മൂർച്ഛിച്ചതിനെ തുടർന്ന് മധ്യവയസ്കൻ സ്വന്തം വീടിന് തീയിട്ടതായി പരാതി.
വകയാർ കൊല്ലംപടിയിൽ താമസിക്കുന്ന സിജു എന്നയാളാണ് ഭാര്യയോടുള്ള ദേഷ്യം തീർക്കാനായി വീടിന് തീ കൊളുത്തിയതെന്ന് പൊലീസ് അറിയിച്ചു. ഇന്ന് പുലർച്ചെ ഒന്നരയോടെയാണ് സംഭവം നടന്നത്.
തീപ്പിടിത്തത്തിൽ ഭാര്യ രജനിക്കും ഇളയ മകനും പൊള്ളലേറ്റു. ഇരുവരെയും താലൂക്ക് ആശുപത്രിയിൽ പ്രവേശിപ്പിച്ചിരിക്കുകയാണ്. രജനിക്ക് ഏകദേശം 40 ശതമാനം വരെ പൊള്ളലേറ്റതായാണ് വിവരം. തീ കൊളുത്തിയ ശേഷം രക്ഷപ്പെടാൻ ശ്രമിച്ച സിജുവിനെ പൊലീസ് പിടികൂടി.
രജനിയുടെയും സിജുവിന്റെയും രണ്ടാം വിവാഹമായിരുന്നു. വിവാഹത്തിന് ശേഷം ഇരുവരും ഒരു വാടകവീട്ടിലാണ് താമസിച്ചിരുന്നത്. രാത്രിയിൽ കുടുംബാംഗങ്ങൾ ഉറങ്ങാൻ കിടന്നതിന് പിന്നാലെയാണ് തീപ്പിടിത്തമുണ്ടായത്.
ശബ്ദം കേട്ട് ഉണർന്നപ്പോഴാണ് വീടിന് തീ പിടിച്ചിരിക്കുന്നത് ശ്രദ്ധയിൽപ്പെട്ടത്. അപ്പോഴേക്കും സിജു വീട്ടിൽ നിന്ന് മുങ്ങിയിരുന്നു.
ഭാര്യയോടുള്ള സംശയമാണ് സംഭവത്തിന് കാരണമെന്നാണ് പൊലീസ് പറയുന്നത്. അറസ്റ്റിലായ സിജു പെയിന്റിംഗ് തൊഴിലാളിയാണെന്നും ഭാര്യയുമായി ഇയാൾ നിരന്തരം വഴക്കുണ്ടാക്കിയിരുന്നുവെന്നും പൊലീസ് അറിയിച്ചു. ഇന്നലെ രാത്രിയും ഇരുവരും തമ്മിൽ തർക്കം നടന്നിരുന്നു.
സിജു ടിന്നറിലോ പെട്രോളിലോ ഉണ്ടായിരുന്ന ദഹനശേഷിയുള്ള വസ്തു ഉപയോഗിച്ചാണ് തീ കൊളുത്തിയതെന്നാണ് പ്രാഥമിക നിഗമനം. തീപ്പിടിത്തത്തിൽ വീടിന്റെ ഒരു ഭാഗം മുഴുവൻ കത്തിനശിച്ചു. പ്രതി നിലവിൽ പൊലീസ് കസ്റ്റഡിയിലാണ്.
ENGLISH SUMMARY
A middle-aged man allegedly set fire to his own house in Pathanamthitta following suspicion and disputes with his wife. The wife and their younger son sustained burn injuries and are undergoing treatment. The accused has been arrested and is in police custody.
pathanamthitta-man-sets-house-on-fire-over-suspicion-wife-injured
Pathanamthitta, house fire, domestic dispute, suspicion, burn injuries, Kerala news, police custody
