ക്രിസ്തുമസ് അവധി റദ്ദാക്കി; ശക്തമായ പ്രതിഷേധവുമായി ക്രിസ്ത്യൻ ചർച്ചസ് ഫെഡറേഷൻ
കോട്ടയം: ക്രിസ്തുമസ് അവധി റദ്ദാക്കിയ ഉത്തരപ്രദേശ് സർക്കാരിന്റെ തീരുമാനത്തിനെതിരെ ശക്തമായ പ്രതിഷേധവുമായി ക്രിസ്ത്യൻ ചർച്ചസ് ഫെഡറേഷൻ (CCF) രംഗത്ത്.
ലോകമെമ്പാടുമുള്ള ജനങ്ങൾ ഒരുമിച്ച് ആഘോഷിക്കുന്ന ക്രിസ്തുമസ് ദിനത്തിൽ സ്കൂളുകൾക്ക് അവധി നിർത്തലാക്കുന്നത് ജനാധിപത്യ മൂല്യങ്ങൾക്കും ഇന്ത്യൻ ഭരണഘടനയ്ക്കും എതിരാണെന്ന് ഫെഡറേഷൻ കുറ്റപ്പെടുത്തി.
ഉത്തരപ്രദേശിലെ സ്കൂളുകളിൽ വർഷങ്ങളായി നൽകിയിരുന്ന ക്രിസ്തുമസ് അവധി അവസാനിപ്പിച്ച സർക്കാർ നടപടി ഉടൻ പിൻവലിക്കണമെന്ന് CCF ആവശ്യപ്പെട്ടു.
അതേസമയം, ചർച്ചിൽ ആരാധന നടത്തിക്കൊണ്ടിരുന്ന വൈദികനെതിരെ സംഘപരിവാർ പ്രവർത്തകർ നടത്തിയ ഭീഷണിയും, ഒഡീഷയിൽ ക്രിസ്തുമസ് സാന്റ വേഷം വിൽപ്പന നടത്തിയ വ്യാപാരികളെ “ഇന്ത്യ ഹിന്ദുരാജ്യമാണ്, ക്രിസ്ത്യൻ ആഘോഷങ്ങൾ പാടില്ല” എന്നുവിളിച്ച് ആക്രമിക്കുകയും ഓടിച്ചുവിടുകയും ചെയ്ത സംഭവങ്ങളും യോഗം കടുത്ത ഭാഷയിൽ അപലപിച്ചു.
സ്വാതന്ത്ര്യം നേടുന്നതിനായി അനേകം മഹാരഥന്മാർ അനുഭവിച്ച ത്യാഗങ്ങളും കഷ്ടപ്പാടുകളും ഇന്ത്യയുടെ ആത്മാവാണെന്നും, വിവിധ സംസ്ഥാനങ്ങളും ഭാഷകളും മതവിഭാഗങ്ങളും വെറ്റില ഇലയിലെ നാരുകൾപോലെ ചേർന്നാണ് ഇന്ത്യ എന്ന രാജ്യം രൂപപ്പെട്ടതെന്നും പ്രസ്താവനയിൽ ചൂണ്ടിക്കാട്ടി.
സ്വാതന്ത്ര്യം നേടിയിട്ട് 78 വർഷങ്ങൾക്ക് ശേഷവും ക്രിസ്തുമസ് ആഘോഷത്തെ ലക്ഷ്യമിട്ട് ഉയരുന്ന എതിർപ്പുകൾ ജനാധിപത്യത്തോടുള്ള നേരിയല്ലാത്ത കടന്നുകയറ്റമാണെന്ന് ഫെഡറേഷൻ വിലയിരുത്തി.
ഇത്തരം മതഭ്രാന്തും സാമൂഹിക വിരുദ്ധതയും പുലർത്തുന്നവർക്കെതിരെ ശക്തമായ നിയമനടപടികൾ സ്വീകരിക്കണമെന്ന് പ്രധാനമന്ത്രി, കേന്ദ്ര ആഭ്യന്തര മന്ത്രി, കേന്ദ്ര ന്യൂനപക്ഷ സഹമന്ത്രി ജോർജ് കുര്യൻ എന്നിവർക്ക് നിവേദനം നൽകിയതായി യോഗം അറിയിച്ചു.
പ്രസിഡന്റ് അഡ്വ. റോയി വാരിക്കാട് അധ്യക്ഷത വഹിച്ച യോഗത്തിൽ ജോഷ്വാ മാത്യു, ഡോ. റോബിൻ പി. മാത്യു, ആമ്പൽ ജോർജ്, ബെന്നി കോട്ടപ്പുറം, പാസ്റ്റർ ഡോ. ബിനു സാമൂൽ, റെജി മാത്യു (തിരുവനന്തപുരം), അരുൺ രാജ് പൂയപ്പള്ളി, രാജു കെ. തോമസ്, ടിജി കെ. തോമസ്, ടോജോ കല്ലറക്കൽ, സി. എ. ജോയി എന്നിവർ സംസാരിച്ചു. ക്രിസ്ത്യൻ ചർച്ചസ് ഫെഡറേഷനുവേണ്ടി ജനറൽ സെക്രട്ടറി ജോഷ്വാ മാത്യു പ്രസ്താവന പുറത്തിറക്കി.
English Summary
The Christian Churches Federation (CCF) has strongly protested against the Uttar Pradesh government’s decision to cancel the Christmas holiday in schools. The federation said denying a holiday on Christmas Day goes against democratic values and the Indian Constitution. The meeting also condemned threats against priests during church services and attacks on traders selling Christmas Santa costumes in Odisha. CCF demanded the immediate withdrawal of the holiday cancellation and urged the central government to take strict legal action against those spreading religious intolerance.
christmas-holiday-cancelled-up-government-ccf-protest
christmas, uttar pradesh, christian churches federation, protest, minority rights, constitution, religious intolerance
