നെടുമബശ്ശേരി വിമാനത്താവളത്തിനു സമീപം റെയിൽവേ സ്റ്റേഷൻ ഉടൻ
കൊച്ചി: നെടുമ്പാശേരി രാജ്യാന്തര വിമാനത്താവളത്തിന് സമീപം റെയിൽവേ സ്റ്റേഷൻ സ്ഥാപിക്കുന്നതിന് വേണ്ടിയുള്ള നീണ്ടുനിന്ന ആവശ്യങ്ങൾ ഇപ്പോൾ യാഥാർഥ്യത്തിലേക്ക്.
കേന്ദ്ര റെയിൽവേ മന്ത്രി അശ്വിനി വൈഷ്ണവ്, ഈ പദ്ധതിയുടെ നിർമ്മാണം ഉടൻ ആരംഭിക്കുമെന്ന് ഉറപ്പുനൽകി. കേന്ദ്രമന്ത്രി ജോർജ് കുര്യനുമായി നടത്തിയ കൂടിക്കാഴ്ചയിലാണ് ഈ ഉറപ്പ് ലഭിച്ചത്.
വിമാനത്താവളത്തിലേക്ക് നേരിട്ട് റെയിൽ കണക്റ്റിവിറ്റി ലഭിക്കണമെന്ന ആവശ്യം യാത്രക്കാരിൽ വർഷങ്ങളായി നിലനിന്നിരുന്നു.
അതിനെ അടിസ്ഥാനമാക്കി കഴിഞ്ഞ വർഷം വിൻഡോ-ട്രെയിലിങ് ഇൻസ്പെക്ഷൻ നടത്തുന്നതിനിടെ തന്നെ റെയിൽവേ മന്ത്രി സ്റ്റേഷന്റെ സ്ഥാനം ഉൾപ്പെടെ പരിശോധിച്ച് ഉദ്യോഗസ്ഥർക്ക് ആവശ്യമായ നിർദേശങ്ങളും നൽകിയിരുന്നു.
മന്ത്രിയുടെ ഉറപ്പ് റെയിൽവേ വികസനത്തിനും, യാത്രക്കാരുടെ സൗകര്യങ്ങൾ വർധിപ്പിക്കാനും ഏറെ പ്രാധാന്യമുള്ള ഘട്ടമായാണ് കണക്കാക്കുന്നത്.
എയർപോർട്ടിലേക്ക് എളുപ്പത്തിലുള്ള ട്രെയിൻ ആക്സസ് ലഭിക്കുന്നത് ആഭ്യന്തരവും അന്താരാഷ്ട്രവുമായ യാത്രക്കാർക്ക് വലിയ ആശ്വാസമായിരിക്കും.
കേന്ദ്ര മന്ത്രി ജോർജ് കുര്യനും റെയിൽവേ മന്ത്രിയോടൊപ്പം ഇൻസ്പെക്ഷനിൽ പങ്കെടുത്തതായും, പദ്ധതിയുടെ പുരോഗതി വേഗത്തിലാക്കാൻ ഇരുവരും പ്രതിജ്ഞാബദ്ധരാണെന്നും റെയിൽവേ വൃത്തങ്ങൾ അറിയിച്ചു.
