തിരുവനന്തപുരം: ബിജെപി നേതാവും നടനുമായ കൃഷ്ണ കുമാറിനും മകള് ദിയ കൃഷ്ണക്കുമെതിരെ തട്ടിക്കൊണ്ടു പോകലിന് കേസെടുത്ത് പോലീസ്. ദിയയുടെ സ്ഥാപനത്തിലെ ജീവനക്കാരുടെ പരാതിയിലാണ് നടപടി.
തിരുവനന്തപുരം കവടിയാറിലുള്ള ഒ ബൈ ഓസി എന്ന പേരില് നടത്തുന്ന സ്ഥാപനത്തിലെ ജീവനക്കാരാണ് പരാതി നല്കിയത്. തട്ടിക്കൊണ്ട് പോയി ഭീഷണിപ്പെടുത്തി പണം വാങ്ങാന് ശ്രമിച്ചു എന്നാണ് പരാതിയിൽ പറയുന്നത്.
ക്യൂആര് കോഡില് കൃത്രിമം കാട്ടി ദിയയുടെ സ്ഥാപനത്തില് നിന്നും പണം തട്ടിയതിനു ജീവനക്കാര്ക്കെതിരെ നേരത്തെ പരാതി നല്കിയിരുന്നു. 69 ലക്ഷം രൂപ തട്ടിയെടുത്തു എന്ന പരാതിയില് മ്യൂസിയം പൊലീസ് കേസ് രജിസ്റ്റര് ചെയ്യുകയും ചെയ്തിരുന്നു. ഇതിന് പിന്നാലെയാണ് ജീവനക്കാർ പരാതി നൽകിയത്.
പണം നഷ്ടപ്പെട്ട സംഭവത്തില് ആരോപണ വിധേയരായ ജീവനക്കാരുമായി കൃഷ്ണ കുമാറും ദിയയും ചര്ച്ച നടത്തിയിരുന്നു. ഇതേ തുടർന്ന് പണം തിരികെ നല്കാന് ആവശ്യപ്പെട്ടിരുന്നു. അതുപ്രകാരം എട്ട് ലക്ഷം രൂപ തിരികെ നല്കി.
ബാക്കി പിന്നീട് നല്കാമെന്നായിരുന്നു ജീവനക്കാരികളും അവരുടെ ബന്ധുക്കളും അറിയിച്ചത്. ജീവനക്കാരികൾ 8,82,000 രൂപ നൽകിയതിന്റെ രേഖകൾ പൊലീസിന് ലഭിച്ചിട്ടുണ്ട്.
വിശദമായ അന്വേഷണത്തിന് ശേഷം അറസ്റ്റ് ഉൾപ്പെടെയുള്ള നടപടികളിലേക്ക് കടക്കാനാണ് പൊലീസ് തീരുമാനം. മുന് ജീവനക്കാരികളായ വിനിത ജൂലിയസ്, ദിവ്യ ഫ്രാങ്ക്ലിന്, രാധു എന്നിവര്ക്കെതിരെയാണ് ദിയ പരാതി നൽകിയിരുന്നത്.
