കട്ടപ്പന: ലോട്ടറി വില്പനക്കാരിയെ കബളിപ്പിച്ച് ലോട്ടറി ടിക്കറ്റുകൾ തട്ടിയെടുത്തതായി പരാതി. തൂക്കുപാലം സ്വദേശിയായ വെട്ടത്ത് കിഴക്കേതിൽ ഗീതയാണ് തട്ടിപ്പിനിരയായത്. ഇവരുടെ പക്കൽ നിന്നും 60 ലോട്ടറി ടിക്കറ്റുകളാണ് തട്ടിയെടുത്തത്.(60 lottery tickets were stolen in kattappana)
കട്ടപ്പന ഐശ്വര്യ തീയേറ്ററിന് സമീപത്തു വെച്ചാണ് സംഭവം. തീയേറ്ററിന് എതിർവശത്തായി അടഞ്ഞു കിടക്കുന്ന മുറി വാടകയ്ക്ക് എടുത്തിട്ടുണ്ടെന്നും ലോട്ടറി വിൽക്കാറുണ്ടെന്നും പറഞ്ഞ് ഒരാൾ ഗീതയെ സമീപിക്കുകയായിരുന്നു. തുടർന്ന് കയ്യിൽ 300 രൂപ മാത്രമാണ് ഉള്ളതെന്നും തൊട്ടടുത്ത കടകളിൽ വില്പന നടത്തിയ ശേഷം തിരിച്ചു വരുമ്പോൾ തുക തരാമെന്നും പറഞ്ഞ് വിശ്വസിപ്പിച്ചു. പിന്നാലെ ഗീതയുടെ കണ്ണ് വെട്ടിച്ച് ഇയാൾ കടന്നു കളയുകയായിരുന്നു.
ഓട്ടോറിക്ഷയിൽ കയറിയാണ് ഇയാൾ രക്ഷപ്പെട്ടത്. ഇയാളുടെ ദൃശ്യങ്ങൾ സമീപത്തെ സിസിടിവി ക്യാമറയിൽ പതിഞ്ഞിട്ടുണ്ട്. വർഷങ്ങളായി ലോട്ടറി വിൽപ്പനയാണ് ഗീതയുടെ ഉപജീവന മാർഗം. ഇവർ കട്ടപ്പന പോലീസിൽ പരാതി നൽകിയിട്ടുണ്ട്.
