കോഴിക്കോട്: കക്കോടി ബിവറേജസ് സെൽഫ് സർവീസ് ഔട്ട്‌ലെറ്റിൽ നിന്ന് മദ്യം മോഷ്ടിച്ച യുവാക്കൾ അറസ്റ്റിൽ. മോഷണം നടത്തിയ നാലുപേരിൽ രണ്ടുപേരാണ് പിടിയിലായത്. അന്നശ്ശേരി പരപ്പാറ എടവനക്കുഴി കോളനിയിലെ മുഹമ്മദ് ആസിഫ് (20), സച്ചിൻ പ്രഭാകരൻ (23) എന്നിവരെയാണ് ചേവായൂർ പൊലീസ് അറസ്റ്റുചെയ്തത്. നാലുദിവസങ്ങളിലായി 11 കുപ്പി മദ്യമാണ് നാലംഗ സംഘം കവർന്നത്.
മേയ് 16, 19, 24, 25 തീയതികളിലാണ് ഇവർ മോഷണം നടത്തിയത്. നല്ല തിരക്കുള്ള സമയമായ മൂന്നിനും അഞ്ചിനും ഇടയ്ക്കും എട്ടിനും ഒമ്പതിനും ഇടയ്ക്കുള്ള സമയത്തുമായിരുന്നു കുപ്പിമോഷണം നടത്തിയത്. 3000 രൂപവരെ വിലയുള്ള ഇന്ത്യൻ നിർമിത വിദേശമദ്യമാണ് മോഷ്ടിച്ചത്.
അവധിയിൽ പോയിരുന്ന ബിവറേജസ് ഔട്ട്‌ലെറ്റ് മാനേജർ ജോലിയിൽ തിരികെയെത്തി കണക്കെടുപ്പ് നടത്തിയപ്പോഴാണ് കുപ്പികളുടെ കുറവു കണ്ടെത്തിയത്. തുടർന്ന് സിസിടിവി ദൃശ്യങ്ങൾ പരിശോധിച്ചതിനെ തുടർന്ന് മോഷണം കണ്ടെത്തുകയായിരുന്നു. ഔട്ട്‌ലെറ്റിനകത്തു കയറി നാലുപേരും കുപ്പികളെടുക്കുന്നതും അരയിലേക്ക് തിരുകി കടന്നുകളയുന്നതും ദൃശ്യങ്ങളിൽ കാണാം. ഇതോടെയാണ് മാനേജർ 28-ന് ചേവായൂർ പോലീസിൽ പരാതി നൽകിയത്.
Read Also: കോഴിക്കോട് ഭക്ഷ്യവിഷബാധ; ഒരു കുടുംബത്തിലെ നാലുപേർ ആശുപത്രിയിൽ: കുട്ടിയുടെ നില ഗുരുതരം
