തൃശൂർ: കെ.എസ്.ആർ.ടി.സി ബസിൽ പെൺകുഞ്ഞിന് ജന്മം നൽകി യുവതി. തിരുനാവായ മൺട്രോ വീട്ടിൽ ലിജീഷിന്റെ ഭാര്യ സെറീന (37) യാണ് ബസിൽവച്ച് കുഞ്ഞിന് ജന്മം നൽകിയത്. തൃശ്ശൂർ തൊട്ടിപ്പാലം കെ.എസ്.ആർ.ടി.സി. ബസിൽ യാത്ര ചെയ്യവേ ആണ് യുവതിക്ക് പ്രസവവേദന തുടങ്ങിയത്.
തുടർന്ന് ബസ് ആശുപത്രിയിലേക്ക് തിരിച്ചുവിട്ടെങ്കിലും ആശുപത്രിയിലെത്തുന്നതിനു മുൻപ് യുവതി പെൺകുഞ്ഞിനെ പ്രസവിക്കുകയായിരുന്നു. ബസ് ആശുപത്രിയിൽ എത്തുമ്പോഴേക്കും പ്രസവത്തിൻറെ 80 ശതമാനത്തോളം പൂർത്തിയായിരുന്നു. തുടർന്ന് ആശുപത്രിയിലെ ഡോക്ടറും നേഴ്‌സും ബസിൽ വച്ച് തന്നെ പ്രസവമെടുക്കുകയായിരുന്നു. അമ്മയും കുഞ്ഞും സുഖമായിരിക്കുന്നതായി ബന്ധപ്പെട്ടവർ അറിയിച്ചു.
