ഒരുവര്‍ഷം നീണ്ട കാത്തിരിപ്പ് വെറുതെയായില്ല എന്ന് തെളിയിക്കുന്നതായിരുന്നു ലിയോ സിനിമയുടെ പ്രദര്‍ശനദിവസം തിയേററ്ററുകളിലെ ആറാട്ട്. ലോകേഷ് കനകരാജ്-വിജയ് കൂട്ടുകെട്ടില്‍ സംഭവിച്ചത് തീര്‍ത്തും അത്ഭുതമായിരുന്നു.
വന്‍ സസ്‌പെന്‍സിലാണ് ചിത്രത്തിന്റെ ആദ്യപകുതി തുടങ്ങുന്നത്. ചിത്രത്തിന്റെ ആദ്യ പകുതിയിലാണ് ടൈറ്റില്‍ എത്തുന്നത്. ഇതുവരെ കാണാത്ത ഒരു വിജയ്‌യെ ആണ് ഈ ചിത്രത്തില്‍ എല്ലാവര്‍ക്കും കാണാന്‍ സാധിക്കുക. ഒരു ഫ്ളാഷ്ബാക്ക് സ്റ്റോറി ഈ സിനിമയ്ക്കും ഉണ്ട്. അത് മാത്രമാണ് കുറച്ചൊരു ക്ലീഷേ. അതൊഴിവാക്കി നിര്‍ത്തിയാല്‍ ഇതൊരു മാസ് ത്രില്ലര്‍ തന്നെയെന്ന് ഒറ്റ സ്വരത്തില്‍ പറയാം. ഇളയദളപതിയുടെ കരിയറിലെ ഏറ്റവും വലിയ നാഴികക്കല്ലാണ് ലിയോയിലൂടെ ലോകേഷ് കനകരാജ് സമ്മാനിച്ചത്. ഈ ചിത്രത്തിലെ ഒരു സീന്‍ പോലും മിസ് ചെയ്യരുത്. അങ്ങനെ ഉണ്ടായാല്‍ അതിലും വലിയ നഷ്ടം മറ്റൊന്നില്ല. അത്രത്തോളം പ്രാധാന്യമാണ് ഇതിലെ ഓരോ രംഗങ്ങള്‍ക്കും. പാര്‍ത്ഥിപനായും ലിയോ ദാസായും വിജയ്‌യുടെ പകര്‍ന്നാട്ടം അവിസ്മരണീയമാണ്.
ഗംഭീരഷോട്ടുകളും മികച്ച ദൃശ്യങ്ങളും ചിത്രത്തിന് കൊടുക്കുന്ന വേറെ ലെവല്‍ ഹൈപ്പ് തന്നെയെന്നാണ് ആരാധകര്‍ ഒന്നടങ്കം ഒരേ മനസോടെ പറയുന്നത്.
തമിഴ്നാട്ടില്‍ ഫാന്‍സ് ഷോ നടത്താന്‍ അനുമതി ലഭിക്കാത്തതിനാല്‍ തമിഴ്നാട്ടില്‍ നിന്നുള്ള കടുത്ത വിജയ് ആരാധകര്‍ കേരളത്തിലും ബാംഗ്ലൂരിലും എല്ലാം എത്തിയാണ് ഫസ്റ്റ് ഡേ ഫസ്റ്റ് ഷോ കണ്ടത്.
ബാബു ആന്റണിയും ചിത്രത്തില്‍ പ്രധാനവേഷത്തില്‍ എത്തുന്നുണ്ട്. ലോകേഷിന്റെ തന്നെ കൈതി റഫറന്‍സ് കൂടി എത്തുന്നതോ ചിത്രത്തിനെ ആവേശത്തിന്റെ കൊടുമുടിയില്‍ കൊണ്ടുപോയി വെക്കുകയാണ്. തൃഷ, സഞ്ജയ് ദത്ത്, അര്‍ജൃുന്‍ സര്‍ജ, ഗൗതം മേനോന്‍, മിഷ്‌കിന്‍, മാത്യു തോമസ്, മന്‍സൂര്‍ അലിഖാന്‍, പ്രിയ ആനന്ദ്, സാന്‍ഡി, ജനനി, അഭിരാമി വെങകിടാചലം തുടങ്ങി വമ്പന്‍ താരനിരയാണ് ഈ ചിത്രത്തിലുള്ളത്.
സെവന്‍സ്‌ക്രീന്‍ സ്റ്റുഡിയോ, ദി റൂട്ട് എന്നിവയുടെ ബാനറുകളില്‍ ലളിത് കുമാറും ജഗദീഷ് പളനിസ്വാമിയും ചേര്‍ന്നാണ് ലിയോ നിര്‍മ്മിക്കുന്നത്. ശ്രീഗോകുലം മൂവീസിന് വേണ്ടി ഗോകുലം ഗോപാലനാണ് കേരളത്തിലെ വിതരണാവകശാം സ്വന്തമാക്കിയത്. ഡ്രീം ബിഗ് ഫിലിംസാണ് കേരളത്തിലെ ഡിസ്ട്രിബ്യൂഷന്‍ പാര്‍ട്ണര്‍. ലിയോയുടെ ഡിഒപി: മനോജ് പരമഹംസ, ആക്ഷന്‍: അന്‍പറിവ്, എഡിറ്റിങ്: ഫിലോമിന്‍ രാജ്, പി ആര്‍ഒ: പ്രതീഷ് ശേഖര്‍
എന്താണ് ലിയോ?
സഞ്ജയ് ദത്ത് ലിയോ (വിജയ്) യുടെ അച്ഛനായിട്ടാണ് വരുന്നത്. മഡോണ സെബാസ്റ്റിന്‍ ലിയോയുടെ സഹോദരിയും. ജീസസ് ഹൊറോസ്‌കോപ് വിശ്വസിച്ച് അച്ഛന്‍ സഹോദരിയെ കൊല്ലുന്നു. അതിന്റെ പ്രതികാര കഥയാണ് സിനിമ. പക്ഷെ ലോകേഷ് കനകരാജിന്റെ സംവിധാന മികവ് ഗംഭീരമാണ്. അതിന് വേണ്ടി സിനിമ കാണാം. സസ്പെന്‍സ് പൊളിക്കുന്നില്ല, തിയേറ്ററില്‍ കണ്ട് ആ വികാരങ്ങള്‍ക്ക് സാക്ഷ്യം വഹിക്കുക.
തിയേറ്ററില്‍ നിന്ന് പുറത്തിറങ്ങുന്നവരോട് ചോദിച്ചപ്പോഴാകട്ടെ, ദളപതി ഉയിര്‍, ഇത് വേറെ ലെവല്‍, ബ്ലോക്ക് ബസ്റ്റര്‍ ഹിറ്റ് എന്നൊക്കെ അവര്‍ വിധി എഴുതിക്കഴിഞ്ഞു. ഇതൊരു പെര്‍ഫക്ട് ഫാന്‍സ് എന്റര്‍ടൈന്‍മെന്റ് സിനിമയാണെന്നത് ഈ പ്രതികരണത്തില്‍ നിന്നും മനസ്സിലാക്കാം. ആരാധകര്‍ക്ക് വേണ്ടിയാണ് സിനിമ ചെയ്യുന്നത് എന്ന് പറഞ്ഞ വിജയ്, ആ വാക്ക് പൂര്‍ണമായും പാലിച്ചു എന്ന് സാരം.
ഫ്‌ളോപ്പായ ക്ലൈമാക്‌സെന്ന് ഒരു വിഭാഗം
ചിത്രം കണ്ടിറങ്ങുന്നവര്‍ ലിയോയെ വാനോളം പുകഴ്ത്തുമ്പോള്‍ സിനിമയെ കുറിച്ച് മോശം അഭിപ്രായവും വരാതെയില്ല. പല അവസരങ്ങളിലും ആ ലുക്ക് വിജയ്ക്ക് മാച്ച് ചെയ്യുന്നില്ല എന്ന് പറഞ്ഞവരും തിയേറ്ററിലുണ്ടായിരുന്നു. ആദ്യത്തെ 50 മിനിട്ട് ഭയങ്കരമായി വലിച്ചു നീട്ടുകയായിരുന്നു. ഫാമിലി ഇമോഷന്‍സ് കൈയ്യിലെടുക്കാന്‍ ശ്രമിച്ചുവെങ്കിലും നടന്നില്ല. ക്ലൈമാക്സും ഫ്ളോപ്പായി. അര്‍ജ്ജുന്‍ സര്‍ജ്ജയുടെ അഭിനയം ഗംഭീരമായിരുന്നു. അനിരുദ്ധിന്റെ സംഗീതവും സിനിമയെ രക്ഷപ്പെടുത്തുന്നില്ല. ലൊക്കേഷന്‍ അത്ര നല്ലതല്ല.. ഇങ്ങനെ പോകുന്നു വിമര്‍ശനങ്ങള്‍…
