ആലപ്പുഴ: പുഴയിൽ കുളിക്കാനിറങ്ങിയ രണ്ടു വിദ്യാർഥികൾ മുങ്ങി മരിച്ചു. തൃക്കുന്നപ്പുഴ പല്ലനയാറ്റിലാണ് അപകടമുണ്ടായത്. തോട്ടപ്പള്ളി ഒറ്റപ്പന ആര്ദ്രം വീട്ടില് ജോയിയുടെ മകന് ആല്ബിന് (14, കരുവാറ്റ സാന്ദ്രാ ജങ്ഷന് പുണര്തം വീട്ടില് അനീഷിന്റെ മകന് അഭിമന്യു (14) എന്നിവരാണ് മരിച്ചത്.
ഇന്ന് വൈകിട്ട് 4 മണിയോടെയായിരുന്നു അപകടമുണ്ടായത്. പല്ലനപാലത്തിന് സമീപത്തെ പുഴയിലാണ് വിദ്യാർഥികൾ കുളിക്കാനിറങ്ങിയത്. ആൽബിനും മൂന്നു സുഹൃത്തുക്കളും ഒന്നിച്ചാണ് പല്ലനയിലെത്തിയത്. അഭിമന്യുവിനൊപ്പം രണ്ട് സുഹൃത്തുക്കളും ഉണ്ടായിരുന്നു.
രണ്ടുസംഘങ്ങളായി വന്നവർ ഒരേ കടവിൽ കുളിക്കുകയായിരുന്നു. ഇവർ പുഴയിൽ കുളിക്കുന്നതിനിടെ അഭിമന്യുവിനെയും ആൽഫിനെയും കാണാതാവുകയായിരുന്നു. തുടർന്ന് മറ്റു കുട്ടികൾ ബഹളം വച്ചതോടെ നാട്ടുകാർ എത്തി തിരച്ചിൽ ആരംഭിച്ചു.
ഒന്നര മണിക്കൂറോളം നടത്തിയ തിരച്ചിലിന് ഒടുവിലാണ് ഇരുവരുടെയും മൃതദേഹങ്ങൾ പുറത്തെടുത്തത്. തോട്ടപ്പള്ളി മലങ്കര സെന്റ് തോമസ് സെൻട്രൽ സ്കൂൾ എട്ടാം ക്ലാസ് വിദ്യാർഥികളാണ് ഇരുവരും.
