ദുബൈയിലെ ടോൾ ഗേറ്റുകളിൽ (സാലിക്) തിരക്ക് അനുസരിച്ച് നിരക്ക് ക്രമീകരിക്കുന്ന ഡൈനാമിക് പ്രൈസിങ്ങ് നടപ്പാക്കാൻ ആർ.ടി.എ. ഒരുങ്ങുന്നതായി സൂചന. ആർ.ടി.എ.യും സാലിക് (ടോൾ ഗേറ്റ് ) കമ്പനിയായ പി.ജെ.എസ്.സി.യും ചേർന്ന് പുതിയ രണ്ട് ടോൾ ഗേറ്റുകൂടി സ്ഥാപിയ്ക്കും. അൽഖൈൽ റോഡിലെ ബിസിനസ് ബേ ക്രോസിങ്ങിലും , അൽമൈദാൻ സ്ട്രീറ്റിനും ഉമ്മുൽ ഷെയ്ഫ് സ്ട്രീറ്റിനും ഇടയിലുള്ള ഷെയ്ഖ് സായിദ് റോഡിലെ അൽ സഫാ സ്ട്രീറ്റിലുമാണ് സാലിക് ഗേറ്റുകൾ സ്ഥാപിയ്ക്കുക. രാവിലെയും വൈകുന്നേരവുമുള്ള തിരക്ക് കുറയ്ക്കുക, പൊതുഗതാഗത സംവിധാനം കൂടുതൽ കാര്യക്ഷമമാക്കുക തുടങ്ങിയ ലക്ഷ്യങ്ങളോടെയാണ് നീക്കം.
ഗതാഗതക്കുരുക്ക് പരിഹരിക്കാൻ പുതിയ ഹൈവേ നിർമിയ്ക്കുമെന്ന് ദുബൈ ഊർജ , അടിസ്ഥാന സൗകര്യ മന്ത്രി സുഹൈൽബിൻ മുഹമ്മദ് അൽ മസ്റൂയി പ്രഖ്യാപിച്ചിരുന്നു. എന്നാൽ യൂറോപ്യൻ രാജ്യങ്ങളിലേതുപോലെ കമ്പനികൾ തിരക്ക് കുറഞ്ഞ സമയങ്ങളിൽ ഓഫീസുകളിലെ പ്രവേശന സമയം ക്രമീകരിച്ചാൽ തിരക്ക് കുറയ്ക്കാനാകുമെന്നും പൊതുജനങ്ങൾക്കിടയിൽ അഭിപ്രായം ഉയരുന്നുണ്ട്.
