സ്വതന്ത്രമായ മാധ്യമ പ്രവർത്തനം വെല്ലുവിളി നേരിടുന്ന ഇക്കാലത്ത് മറ്റൊരു മാധ്യമ സ്വാതന്ത്ര്യ ദിനം കൂടി.
ഇന്ന് ലോക മാധ്യമ സ്വാതന്ത്ര്യ ദിനം. ജനാധിപത്യത്തിന്റെ നാലാം തൂൺ എന്നറിയപ്പെടുന്ന മാധ്യമങ്ങളെ കൂച്ചു വിലങ്ങിടുന്ന കാഴ്ച്ചയാണ് ലോകമെങ്ങും കാണാനാവുക. മാധ്യമ സ്വാതന്ത്ര്യത്തിനു മേലുള്ള കടന്നു കയറ്റത്തെ ചെറുക്കുക, മാധ്യമ പ്രവർത്തനത്തിനിടെ ജീവൻ നഷ്ടപ്പെട്ടവരുടെ സ്മരണ പുതുക്കുക എന്നീ ലക്ഷ്യങ്ങളോടെയാണ് ലോക മാധ്യമ സ്വാതന്ത്ര്യ ദിനം ആചരിക്കുന്നത്.`ഭൂമിക്ക് വേണ്ടി മാധ്യമങ്ങൾ :പരിസ്ഥിതി പ്രതിസന്ധികൾക്കിടയിലെ മാധ്യമ പ്രവർത്തനം എന്നതാണ് ഈ വർഷത്തെ പ്രമേയം.
65 ഓളം രാജ്യങ്ങളിൽ തെരഞ്ഞെടുപ്പ് നടക്കുന്ന ഈ വർഷത്തിൽ, വ്യാജ വാർത്തകളുടെ വ്യാപനം വലിയ ഭീഷണിയാണ് ഉയർത്തുന്നത്. ഇതുമൂലം പല മാധ്യമങ്ങളുടെയും നിലനിൽപ്പ് തന്നെ ഭീഷണിയിലാണ്. സ്വതന്ത്രമായി മാധ്യമ പ്രവർത്തനം നടത്തുന്നവർക്ക് അപകടകരമായ രാജ്യമായി ഇന്ത്യ മാറുകയാണെന്നാണ് കണക്കുകൾ സൂചിപ്പിക്കുന്നത്. 2014 ൽ മാധ്യമ സ്വാതന്ത്ര്യ സൂചികയിൽ 180 രാജ്യങ്ങളിൽ 140 -ആം സ്ഥാനത്തായിരുന്ന ഇന്ത്യ, 2024ൽ19 സ്ഥാനം പിന്നോട്ട് പോയി 159 – മതായി.സാങ്കേതിക വിദ്യകളുടെ വളർച്ച വ്യാജ വാർത്തകൾ പെരുകാൻ കൂടി കാരണമായതോടെ നിഷ്പക്ഷമായ മാധ്യമങ്ങൾ പോലും കനത്ത വെല്ലുവിളിയാണ് നേരിടുന്നത്. അഭിപ്രായ സ്വാതന്ത്ര്യം അടിസ്ഥാന അവകാശമാണെന്ന് ജനങ്ങളെയും സർക്കാരിനെയും ഓർമ്മിപ്പിക്കുക കൂടിയാണ് ഈ ദിനത്തിന്റെ ഉദ്ദേശം.
