തിരുവനന്തപുരം: സംസ്ഥാനത്ത് സർവീസ് നടത്തുന്ന ആംബുലന്സുകള്ക്ക് താരിഫ് ഏര്പ്പെടുത്തി. ഗതാഗത മന്ത്രി കെ ബി ഗണേഷ് കുമാറാണ് ഇക്കാര്യം അറിയിച്ചത്. ഐസിയു സംവിധാനം ഉള്ള ആംബുലന്സിന് 10 കിലോമീറ്ററില് 2,500 രൂപയും സി ലെവല് ആംബുലന്സിന് 1,500 രൂപയും ബി ലെവല് ആംബുലന്സിന് 1000 രൂപയുമാണ് മിനിമം ചാര്ജ് ഈടാക്കുക.(Tariff for ambulance in kerala)
രാജ്യത്ത് തന്നെ ആദ്യമായാണ് ഒരു സംസ്ഥാനം ആംബുലന്സിന് താരിഫ് പ്രഖ്യാപിക്കുന്നത്. ഐസിയു സംവിധാനം ഉള്ള ആംബുലന്സ് അധിക കിലോമീറ്ററിന് 50 രൂപയും മറ്റുള്ളവയ്ക്ക് 40, 30 രൂപ വീതവും ഈടാക്കും. വെന്റിലേറ്റര് ആംബുലന്സ് ഉപയോഗിക്കുന്ന ബിപിഎല് കാര്ഡ് ഉടമകള്ക്ക് 20 ശതമാനം ഇളവ് ഉണ്ടാകും. കാന്സര് രോഗികള്ക്കും 12 വയസ്സിന് താഴെയുള്ള കുട്ടികള്ക്കും ഓരോ കിലോമീറ്ററും രണ്ടു രൂപ വെച്ച് ഇളവ് നല്കുമെന്നും മന്ത്രി അറിയിച്ചു.
താരിഫുകള് ആംബുലന്സില് പ്രദര്ശിപ്പിക്കും. യാത്രാ വിവരങ്ങള് അടങ്ങിയ ലോഗ് ബുക്ക് ആംബുലന്സില് നിര്ബന്ധമാക്കുകയും സംശയം തോന്നുന്ന ആംബുലന്സുകളില് പരിശോധന നടത്തുകയും ചെയ്യുമെന്ന് മന്ത്രി വ്യക്തമാക്കി. ആംബുലന്സ് ഡ്രൈവര്മാര്ക്ക് പ്രത്യേക തിരിച്ചറിയല് കാര്ഡും യൂണിഫോമും ഏര്പ്പെടുത്തുമെന്നും മന്ത്രി അറിയിച്ചു.
