വിമാനത്താവളത്തിലെ പരിശോധനയ്ക്കിടയിൽജീവനുള്ള പാമ്പ്, കുരങ്ങിന്റെ കൈ, ചത്ത പക്ഷി തുടങ്ങിയ വിചിത്ര സാധനങ്ങളുമായി ബാഗുകൾ കണ്ടെത്തി. ദുർമന്ത്രവാദത്തിനായി കടത്തുക എന്ന ലക്ഷ്യത്തോടെയാണ് ഇവ വിമാനത്താവളത്തിൽ എത്തിച്ചത് എന്ന് കരുതുന്നു. ദുബായ് രാജ്യാന്തര വിമാനത്താവളത്തിൽ ആണ് സംഭവം. പതിവ് പരിശോധനയ്ക്കിടെ ഒരു യാത്രക്കാരന്റെ ബാഗിനെ കുറിച്ച് സംശയം തോന്നിയ കസ്റ്റംസ് ഇത് സൂക്ഷ്മ പരിശോധനയ്ക്ക് വിധേയമാക്കുകയായിരുന്നു. വിശദമായ സ്കാനിങ്ങിൽ ബാഗിലെ പ്ലാസ്റ്റിക്ക് പെട്ടിക്കകത്ത് സൂക്ഷിച്ച നിലയിലാണ് ജീവനുള്ള പാമ്പ് കുരങ്ങിന്റെ കൈ ചത്ത പക്ഷി, പഞ്ഞിയിൽ പൊതിഞ്ഞ നിലയിൽ മുട്ടകൾ എന്നിവ കണ്ടെത്തിയത്. കൂടാതെ നിരവധി മന്ത്രത്തകിടുകളും ബാഗിൽ നിന്നും കണ്ടെത്തി.
ദുർമന്ത്രവാദത്തിനായാണ് ഇവ കടത്തിയെതെന്നാണ് സംശയിക്കുന്നത്. പിടിച്ചെടുത്ത വസ്തുക്കൾ കൂടുതൽ പരിശോധനയ്ക്കായി ഇസ്ലാമിക് എഫേഴ്സ് ആൻഡ് ചാരിറ്റബിൾ ആക്ടിവിറ്റീസ് വകുപ്പിന് കൈമാറി. ബാഗുകളുടെ ഉടമസ്ഥൻ അറസ്റ്റിലായതായാണ് സൂചന. ഇയാളെക്കുറിച്ച് വിവരങ്ങൾ ലഭ്യമായിട്ടില്ല.
