തെന്നിന്ത്യയിൽ തരംഗമായ സിനിമയാണ് അല്ലു അർജുന്റെ പുഷ്പ: ദ റൈസ്. ചിത്രത്തിലെ മികച്ച പ്രകടനത്തിലൂടെ അല്ലു അർജുനെ ദേശീയ അവാർഡും തേടിയെത്തി. സുകുമാര് സംവിധാനം ചെയ്ത ചിത്രത്തില് രശ്മിക മന്ദാനയാണ് നായികയായി എത്തിയത്. ഭന്വാര് സിങ് ശെഖാവത്ത് എന്ന മാസ് വില്ലനായി അല്ലുവിനൊപ്പം ഇഞ്ചോടിഞ്ച് പ്രകടനവുമായി ഫഹദ് ഫാസിലും എത്തിയിരുന്നു. ഇപ്പോഴിതാ ചിത്രത്തിന്റെ രണ്ടാം ഭാഗമായ പുഷ്പ: ദ റൂളിന്റെ ടീസർ പുറത്തു വിട്ടിരിക്കുകയാണ് അണിയറ പ്രവർത്തകർ.
അല്ലു അർജുന്റെ ജന്മജദിനമായ ഇന്ന് നിർമ്മാതാക്കളായ മൈത്രി മൂവി മേക്കേഴ്സാണ് ടീസർ പുറത്തുവിട്ടത്. ഒരു മിനിറ്റ് ദൈർഘ്യമുള്ള ടീസറിൽ അല്ലുവിന്റെ അർദ്ധനാരി വേഷത്തിലുള്ള ഫൈറ്റ് സീനിന്റെ ഒരു ഭാഗം മാത്രമാണ് കാണിച്ചിരിക്കുന്നത്. പോസ്റ്റർ മുതല് പ്രേക്ഷകരില് ആകാംക്ഷ നിറച്ച സിനിമയുടെ ടീസറിനു മികച്ച പ്രതികരണമാണ് ലഭിക്കുന്നത്.
ടീസറിന് മുന്നോടിയായി അല്ലു അർജുന് ഇന്സ്റ്റഗ്രാമില് പങ്കുവെച്ച പോസ്റ്റും വൈറലായിരുന്നു. ‘എല്ലാം സെറ്റ്’ എന്ന ക്യാപ്ഷനോടെ സ്റ്റുഡിയോയില് നിന്നുള്ള ഒരു ചിത്രമാണ് താരം പങ്കുവെച്ചിരുന്നത്. ദേവിശ്രീ പ്രസാദ് സംഗീതം നല്കുന്ന ഗാനങ്ങളാണ് സിനിമയുടെ മറ്റൊരു പ്രധാന ആകര്ഷണം. 2024 ആഗസ്റ്റ് 15ന് പുഷ്പ: ദ റൂൾ തിയേറ്ററുകളിലെത്തും.
Read Also: പള്ളികളിൽ കേരള സ്റ്റോറി പ്രദർശിപ്പിച്ച് ഇടുക്കി രൂപത
