പൂജ കേട്ടു, അമ്മയുടെ മോളെ എന്നുള്ള വിളി
കൊച്ചി: ഇങ്ങനെ ഒരു പിറന്നാൾ സമ്മാനം ഒരുപക്ഷേ ആർക്കും ലഭിച്ചിട്ടുണ്ടാകില്ല. തൻറെ രണ്ടാം പിറന്നാൾ ദിനത്തിൽ ആദ്യമായി ശബ്ദം കേട്ടതിൻറെ അമ്പരപ്പും കൗതുകവുമെല്ലാം ആ കുരുന്നിൻറെ കണ്ണുകളിൽ മിന്നി മറയുന്നുണ്ടായിരുന്നു. കാസർഗോഡ് രാജപുരം സ്വദേശികളായ ഗിരീശൻറെയും നീതുമോളുടേയും മകളായ പൂജയാണ് ഭാഗ്യവതിയായ ആ കുഞ്ഞ്.
രണ്ടുവർഷം മുമ്പ് പിറന്ന കുഞ്ഞിന് ശ്രവണശേഷിയില്ലെന്നും അതിനാൽ കുട്ടി സംസാരിക്കുകയില്ലെന്നും അറിഞ്ഞ നാൾ മുതൽ ആകെ തകർന്ന അവസ്ഥയിലായിരുന്നു ആ കുടുംബം. ഇത് പരിഹരിക്കുന്നതിന് കോക്ലിയർ ഇംപ്ലാൻറേഷൻ നടത്തണമെന്നും അതിന് പത്ത് ലക്ഷം രൂപയോളം ചെലവ് വരുമെന്നും ഡോക്ടർമാർ പറഞ്ഞപ്പോൾ ആ നിർധന കുടുംബത്തിന് എന്ത് ചെയ്യണമെന്ന് അറിയില്ലായിരുന്നു. അങ്ങനെയിരിക്കെയാണ് ലിസി ആശുപത്രിയിയിലെ സൗജന്യ കോക്ലിയർ ഇംപ്ലാൻറ ് ശസ്ത്രക്രിയ നടത്തുന്നതിനുളള ‘ലിസ് ശ്രവൺ ‘ പദ്ധതിയെക്കുറിച്ച് അവർക്ക് വിവരം ലഭിച്ചത്.
തുടർന്ന് ലിസി ആശുപത്രിയിലേക്ക് കുട്ടിയുടെ ചികിത്സാരേഖകളും ആയി അവർ എത്തുകയായിരുന്നു. കുട്ടിയെ പരിശോധിച്ച ഡോക്ടർമാർ എത്രയും വേഗം കോക്ലിയർ ഇംപ്ലാൻറ ് ശസ്ത്രക്രിയ നടത്തുവാനുള്ള ഒരുക്കങ്ങൾ ചെയ്തു. ആ കുടുംബത്തിൻറെ സാമ്പത്തിക സാഹചര്യങ്ങൾ മനസ്സിലാക്കിയ ലിസി ആശുപത്രി മാനേജ്മെൻറ ് പൂർണ്ണമായും സൗജന്യമായി ശസ്ത്രക്രിയ നടത്തുവാൻ തയ്യാറാവുകയായിരുന്നു.
രണ്ടാഴ്ച മുമ്പാണ് 5 മണിക്കൂർ നീണ്ട ശസ്ത്രക്രിയയിലൂടെ കുഞ്ഞിന് ഇംപ്ലാൻറ ഘടിപ്പിച്ചത്. അതിനുശേഷം പിറന്നാൾ ദിനമായ ഇന്ന് (26.7.2025, ശനി) അയിരുന്നു ഇംപ്ലാൻറിൻറെ സ്വിച്ച് ഓൺ കർമ്മം. കുഞ്ഞിൻറെ തുടർന്നുള്ള പ്രതികരണങ്ങൾ കണ്ടപ്പോൾ മാതാവിനുണ്ടായ സന്തോഷം അതിന് സാക്ഷ്യം വഹിച്ച എല്ലാവരിലേക്കും പടർന്നു. തങ്ങളുടെ മകൾക്ക് കിട്ടാവുന്ന ഏറ്റവും വലിയ പിറന്നാൾ സമ്മാനമാണ് ഇതെന്ന് അവർ പറഞ്ഞു.
കോക്ലിയർ ഇംപ്ലാൻറ ് സർജൻ ഡോ. മേഘാ കൃഷ്ണൻറെ നേതൃത്വത്തിലായിരുന്നു ശസ്ത്രക്രിയ. ഇ.എൻ.ടി വിഭാഗത്തിലെ ഡോ. റീന വർഗീസ്, ഡോ. ഫ്രാങ്കി ജോസ്, ഡോ. ദിവ്യ മോഹൻ, ഡോ. ജോസഫ് മാത്യു എന്നിവരും ശിശുരോഗ വിഭാഗം തലവൻ ഡോ. ടോണി മാമ്പിള്ളിയുടെ നേതൃത്വത്തിലുള്ള ഡോക്ടർമാരും അനസ്തേഷ്യ വിഭാഗം തലവൻ ഡോ. കെ രാജീവിൻറെ നേതൃത്വത്തിലുള്ള ഡോക്ടർമാരും, റേഡിയോളജി വിഭാഗം തലവൻ ഡോ. അമൽ ആൻറണി, ഡോ. സുശീൽ എലിയാസ് എന്നിവരുടെ നേതൃത്വത്തിൽ ഉള്ള ഡോക്ടർമാരും, ഇംപ്ലാൻറ് ഓഡിയോളജിസ്റ്റ് ഗൗരി രാജലക്ഷ്മിയുടെ നേതൃത്വത്തിൽ ഉളള സംഘവും ചികിത്സയിൽ പങ്കാളികളായിരുന്നു.
ലിസി ആശുപത്രി ഡയറക്ടർ ഫാ. പോൾ കരേടൻറെ നേതൃത്വത്തിൽ കേക്ക് മുറിച്ച് മധുരം പങ്കു വച്ച് കുഞ്ഞിൻറെ പിറന്നാൾ ആഘോഷിച്ചു. ജോ. ഡയറക്ടർമാരായ ഫാ.റോജൻ നങ്ങേലിമാലിൽ, ഫാ. റെജു കണ്ണമ്പുഴ, അസി.ഡയറക്ടർമാരായ ഫാ. ഡേവിസ് പടന്നക്കൽ, ഫാ. ജെറ്റോ തോട്ടുങ്കൽ എന്നിവരും ആശുപത്രി ജീവനക്കാരും ചടങ്ങിന് എത്തിയിരുന്നു. പുത്തനുടുപ്പും പിറന്നാൾ സമ്മാനങ്ങളും നൽകിയാണ് കുഞ്ഞിനെ ആശുപത്രിയിൽ നിന്നും യാത്രയാക്കിയത്.
ENGLISH SUMMARY:
In a heartwarming moment on her second birthday, Pooja, the daughter of Girish and Neethumol from Rajapuram, Kasaragod, heard sound for the first time. The surprise and wonder in her eyes captured the joy of a life-changing gift—restoring her hearing—making it a birthday unlike any other.
