ജയിലിൽ കഴിയുന്ന കന്നഡ നടി പവിത്രാ ഗൗഡക്ക് ദിവസം ഒരുനേരം വീട്ടിൽ നിന്നുള്ള ഭക്ഷണം നൽകാൻ കോടതി അനുമതി
ബെംഗളൂരു: രേണുകാസ്വാമി കൊലക്കേസിൽ അറസ്റ്റിലായി ജയിലിൽ കഴിയുന്ന കന്നഡ നടി പവിത്രാ ഗൗഡക്ക് ദിവസം ഒരുനേരം വീട്ടിൽ നിന്നുള്ള ഭക്ഷണം നൽകാൻ കോടതി അനുമതി നൽകി.
ജയിലിലെ ഭക്ഷണം ആരോഗ്യപ്രശ്നങ്ങൾ സൃഷ്ടിക്കുന്നതായി ചൂണ്ടിക്കാട്ടി പവിത്രാ കോടതിയെ സമീപിച്ചതിന്റെ അടിസ്ഥാനത്തിലാണ് അനുകൂല ഉത്തരവ്. കേസിലെ മറ്റ് പ്രതികളായ നാഗരാജു, ലക്ഷ്മണൻ എന്നിവർക്കും സമാനമായി വീട്ടിലെ ഭക്ഷണം അനുവദിച്ചിട്ടുണ്ട്.
2024 ജൂണിൽ നടൻ ദർശന്റെ കടുത്ത ആരാധകനായ രേണുകാസ്വാമിയെ തട്ടിക്കൊണ്ടുപോയി ക്രൂരമായി മർദിച്ച ശേഷം കൊലപ്പെടുത്തിയെന്നതാണ് കേസ്.
സംഭവത്തിൽ ദർശനും പവിത്രാ ഗൗഡയും അറസ്റ്റിലായെങ്കിലും പിന്നീട് ഇരുവർക്കും ജാമ്യം ലഭിച്ചിരുന്നു.
എന്നാൽ കഴിഞ്ഞ ഓഗസ്റ്റ് മാസത്തിൽ സുപ്രീംകോടതി ജാമ്യം റദ്ദാക്കിയതിനെ തുടർന്ന് പവിത്രാ വീണ്ടും ജയിലിലായി. കേസിൽ വിചാരണ അടുത്തിടെ ആരംഭിച്ചിട്ടുണ്ട്.
ദർശൻ തൂഗുദീപും പവിത്രാ ഗൗഡയും തമ്മിലുള്ള ബന്ധം വർഷങ്ങളായി കന്നഡ സിനിമാ ലോകത്തെ വലിയ വിവാദ വിഷയമാണ്. ഇരുവരും മറ്റുള്ളവരുമായി വിവാഹിതരായിരിക്കെയാണ് പ്രണയബന്ധം ആരംഭിച്ചത്.
ദർശന്റെ ഭാര്യ വിജയലക്ഷ്മിയാണ്. ഇവർക്ക് ഒരു മകനുമുണ്ട്. പവിത്രയുടെ ഭർത്താവ് സഞ്ജയ് സിങ്ങാണ്; ഇവർക്കൊരു മകളുമുണ്ട് — ഖുശി ഗൗഡ.
കഴിഞ്ഞ പത്തുവർഷമായി ദർശനും പവിത്രയും പ്രണയത്തിലാണെന്ന് പവിത്ര തുറന്നു പറഞ്ഞിട്ടുണ്ട്. ദർശന്റെ ഭാര്യക്ക് ബന്ധത്തെക്കുറിച്ച് അറിയാമെന്നും സമ്മതത്തോടെയാണ് ബന്ധം തുടരുന്നതെന്നുമുള്ള പവിത്രയുടെ പ്രസ്താവനകളും മുമ്പ് വിവാദമായിരുന്നു.
ഈ ബന്ധത്തെ ചൊല്ലി പവിത്രയും വിജയലക്ഷ്മിയും തമ്മിൽ വാക്കേറ്റങ്ങളും ഉണ്ടായിട്ടുണ്ട്.
സംഭവത്തിൽ കൊല്ലപ്പെട്ട 33 വയസ്സുകാരനായ രേണുകാസ്വാമി ദർശന്റെ കടുത്ത ആരാധകനായിരുന്നു.
ദർശനും പവിത്രയുമായുള്ള ബന്ധം അംഗീകരിക്കാനാകാതെ ഇയാൾ സാമൂഹിക മാധ്യമങ്ങളിലൂടെ പവിത്രക്കെതിരെ പ്രതികരിച്ചതായാണ് കേസ്.
രേണുകാസ്വാമി അശ്ലീല സന്ദേശങ്ങൾ അയച്ചുവെന്ന് പറഞ്ഞ് ഇയാളെ കണ്ടെത്താൻ ദർശൻ ക്വട്ടേഷൻ നൽകിയതായും അന്വേഷണത്തിൽ കണ്ടെത്തി.
ആർ.ആർ.നഗറിലെ ദർശന്റെ വീട്ടിൽ വെച്ച് ക്വട്ടേഷൻ സംഘത്തോടൊപ്പം ഇയാളെ ക്രൂരമായി മർദിച്ചതായും മർദനത്തിനിടെയാണ് മരണമുണ്ടായതെന്നും പൊലീസ് പറയുന്നു. പിന്നീട് മൃതദേഹം മാലിന്യക്കൂമ്പാരത്തിൽ ഉപേക്ഷിച്ചു.
ദർശനെതിരെ നേരത്തെയും ഗാർഹിക പീഡന കേസുകളും ആക്രമണ കേസുകളും രജിസ്റ്റർ ചെയ്തിട്ടുണ്ടെന്നതും ഈ കേസിൽ വീണ്ടും ചർച്ചയാകുകയാണ്.
English Summary
A Bengaluru court has permitted jailed Kannada actress Pavithra Gowda, accused in the Renukaswamy murder case, to receive home-cooked food once a day citing health issues caused by prison food. Similar permission was granted to two other accused. The high-profile case involves actor Darshan and stems from allegations that a fan was kidnapped, assaulted, and killed following a dispute linked to Darshan and Pavithra’s relationship.
pavithra-gowda-jail-home-food-permission-renukaswamy-murder-case
Pavithra Gowda, Darshan Thoogudeepa, Renukaswamy murder case, Kannada cinema, celebrity crime, Bengaluru court, jail news, Indian film industry
