‘ഗ്രേ ഡിവോഴ്സ്’, ‘സൈലന്റ് ഡിവോഴ്സ്’, ഇപ്പോഴിതാ ‘മെനോഡിവോഴ്സ്’; 40 -കളിൽ വിവാഹമോചനം കൂടുന്നതിന് കാരണം
‘ഗ്രേ ഡിവോഴ്സ്’, ‘സൈലന്റ് ഡിവോഴ്സ്’ എന്നീ പദങ്ങൾക്കുശേഷം ബന്ധങ്ങളിലെ പുതിയൊരു പ്രവണതയായി ‘മെനോഡിവോഴ്സ്’ എന്ന ആശയം വാർത്തകളിൽ ശ്രദ്ധേയമാകുന്നു.
40 മുതൽ 60 വയസ് വരെ പ്രായമുള്ള ദമ്പതികൾക്കിടയിൽ വർധിച്ചുവരുന്ന വിവാഹമോചനങ്ങളെയാണ് ഈ പദം സൂചിപ്പിക്കുന്നത്.
സ്ത്രീകളിൽ ആർത്തവവിരാമം (Menopause) ഉണ്ടാകുന്ന കാലഘട്ടത്തിൽ ദാമ്പത്യബന്ധങ്ങളിൽ ഉണ്ടാകുന്ന വലിയ മാറ്റങ്ങളാണ് ‘മെനോഡിവോഴ്സ്’ എന്ന പേരിൽ വിശേഷിപ്പിക്കപ്പെടുന്നത്.
ആർത്തവവിരാമ സമയത്ത് സ്ത്രീകളിൽ ഉണ്ടാകുന്ന ഹോർമോൺ വ്യതിയാനങ്ങൾ ശാരീരികവും മാനസികവുമായ ആരോഗ്യത്തെ ഗൗരവമായി ബാധിക്കാറുണ്ട്.
ഈസ്ട്രജൻ, പ്രോജസ്റ്ററോൺ എന്നീ ഹോർമോണുകളുടെ അളവ് കുറയുന്നതോടെ ഉറക്കമില്ലായ്മ, മാനസിക സമ്മർദ്ദം, പെട്ടെന്നുള്ള ദേഷ്യം, വികാര വ്യതിയാനങ്ങൾ എന്നിവ അനുഭവപ്പെടാം.
ഇതിന്റെ ഫലമായി പങ്കാളിയുമായുള്ള അഭിപ്രായവ്യത്യാസങ്ങൾ കൂടുതൽ രൂക്ഷമാകുകയും, വർഷങ്ങളായി സഹിച്ചുപോന്ന പ്രശ്നങ്ങൾ ഇനി വേണ്ടെന്ന തീരുമാനത്തിലേക്ക് സ്ത്രീകൾ എത്തുകയും ചെയ്യുന്നു.
ഇതുവരെ ഭാര്യയും അമ്മയും എന്ന തിരിച്ചറിയലിൽ മാത്രം ജീവിച്ചിരുന്ന പല സ്ത്രീകളും ഈ ഘട്ടത്തിൽ സ്വന്തം വ്യക്തിത്വം തിരികെ കണ്ടെത്താൻ ശ്രമിക്കുന്നു.
സ്വയം പ്രാധാന്യം നൽകാനുള്ള ഈ തീരുമാനങ്ങൾ ചില പുരുഷന്മാർക്ക് അംഗീകരിക്കാൻ ബുദ്ധിമുട്ടാകുന്നതും വിവാഹബന്ധം തകരാൻ ഇടയാക്കുന്നു.
ദീർഘകാലമായി അനുഭവിച്ച അവഗണനകളും വിവേചനങ്ങളും ഇനി സഹിക്കേണ്ടതില്ലെന്ന ബോധ്യമാണ് പല സ്ത്രീകളെയും വിവാഹമോചനത്തിലേക്ക് നയിക്കുന്നത്.
‘മെനോഡിവോഴ്സ്’ പോലുള്ള സാഹചര്യങ്ങൾ ഒഴിവാക്കാൻ ദമ്പതികൾക്കിടയിൽ പരസ്പര ധാരണയും കരുതലും അനിവാര്യമാണ്. ആർത്തവവിരാമകാലത്ത് സ്ത്രീകളിൽ ഉണ്ടാകുന്ന ശാരീരിക-മാനസിക മാറ്റങ്ങളെക്കുറിച്ച് ഇരുപക്ഷവും വ്യക്തമായ അറിവ് നേടണം.
വീട്ടുജോലികളും ഉത്തരവാദിത്വങ്ങളും തുല്യമായി പങ്കിടുന്നത് സ്ത്രീകൾ അനുഭവിക്കുന്ന മാനസിക സമ്മർദ്ദം കുറയ്ക്കാൻ സഹായിക്കും.
പ്രശ്നങ്ങൾ ദാമ്പത്യത്തെ ബാധിക്കുന്നതായി തോന്നിയാൽ മടിക്കാതെ ഡോക്ടറുടെയോ കൗൺസിലറുടെയോ സഹായം തേടുന്നതും ബന്ധം സംരക്ഷിക്കാൻ സഹായകരമാകും.
English Summary
After terms like “grey divorce” and “silent divorce,” a new relationship trend called “menodivorce” is gaining attention. The term refers to the increasing number of divorces among couples aged between 40 and 60, linked to changes women experience during menopause. Hormonal fluctuations during menopause can affect women’s physical and mental health, leading to stress, mood swings, sleep disturbances, and emotional strain. This phase often prompts women to reassess long-standing marital issues and prioritize personal well-being, which can sometimes result in divorce. Experts emphasize mutual understanding, shared responsibilities, awareness about menopause-related changes, and professional counseling to help couples navigate this phase together.
menodivorce-menopause-marriage-trend-explained
Menodivorce, Menopause, Marriage, Divorce trends, Women health, Relationships, Mental health, Family life
