കൊച്ചി: അവരോട് ഞങ്ങൾ പൊറുത്തു. ഗുണകേവിൽ കയറിയതിന്റെ പേരിൽ തമിഴ്നാട് പൊലീസിൽ മർദ്ദനമേറ്റ സംഭവത്തിൽ പരാതിയില്ലെന്ന് മഞ്ഞുമ്മേൽ ബോയ്സ്. അന്നത്തെ പൊലീസുകാരെല്ലാം ഇന്ന് വിശ്രമ ജീവിതത്തിലാകും. ഇനി അന്വേഷണമോ നടപടിയോ ഉണ്ടായാൽ അവർക്കത് ബുദ്ധിമുട്ടാകും. അതുകൊണ്ട് പരാതി ഇല്ലെന്ന് രക്ഷകനായ സിജു ഡേവിഡ് പ്രതികരിച്ചു.
ഇനിയെങ്കിലും കാര്യങ്ങളെ മുൻവിധിയോടെ സമീപിക്കരുതെന്നാണ് അഭ്യർത്ഥനയെന്നും സിജു പറഞ്ഞു. മഞ്ഞുമ്മൽ ടീം നേരിട്ട പൊലീസ് നടപടി അന്വേഷിക്കാൻ തമിഴ്നാട് ആഭ്യന്തര വകുപ്പ് ഉത്തരവിട്ടിരുന്നു. കേസിൽ അന്വേഷണം അനാവശ്യമാണെന്നാണ് ‘മഞ്ഞുമ്മൽ ബോയ്സ്’ സിനിമയുടെ സംവിധായകൻ ചിദംബരത്തിന്റെ പ്രതികരണം. സംഘാംഗങ്ങൾ ഗുണ കേവിലേക്ക് കടന്നു കയറിയതാണ്. തിരഞ്ഞെടുപ്പുകാലത്ത് എത്തിയ പൊലീസുകാരാണ് അന്ന് ഡ്യൂട്ടിയിൽ ഉണ്ടായിരുന്നത്. പൊലീസുകാരെ കുറ്റം പറയാനാകില്ലെന്നും ചിദംബരം പറഞ്ഞു.
