ആകാശത്ത് മസ്കിന്റെ മെഗാ-ഷോ, ഭൂമിയിൽ തല കാക്കാൻ ഹെൽമറ്റ് നിർബന്ധം!
ലോ എർത്ത് ഓർബിറ്റിൽ (LEO) ഉപഗ്രഹ മെഗാ-കോൺസ്റ്റെലേഷനുകളുടെ ദ്രുതഗതിയിലുള്ള വ്യാപനം ലോകമെമ്പാടും ആശങ്ക ഉയർത്തുന്നു.
കാലാവധി പൂർത്തിയാകുന്ന ഉപഗ്രഹങ്ങളെ ഭൂമിയുടെ അന്തരീക്ഷത്തിലേക്ക് ഭ്രമണപഥം താഴ്ത്തി കത്തിച്ച് നശിപ്പിക്കുന്ന (ഡീകമ്മീഷൻ) രീതിയാണ് SpaceX ഉൾപ്പെടെയുള്ള കമ്പനികൾ സ്വീകരിക്കുന്നത്.
എന്നാൽ ഇത്തരത്തിൽ ഉപഗ്രഹങ്ങൾ വീണ്ടും അന്തരീക്ഷത്തിലേക്ക് പ്രവേശിക്കുമ്പോൾ ഉണ്ടാകുന്ന അവശിഷ്ടങ്ങൾ ദീർഘകാല അപകടസാധ്യത സൃഷ്ടിക്കാമെന്ന് ശാസ്ത്രജ്ഞരും ബഹിരാകാശ വിദഗ്ധരും മുന്നറിയിപ്പ് നൽകുന്നു.
ലോകത്തിലെ ഏറ്റവും വലിയ സാറ്റലൈറ്റ് ശൃംഖലയായ Starlink സ്പേസ്എക്സിന്റേതാണ്.
ആയിരക്കണക്കിന് ഉപഗ്രഹങ്ങൾ തുടർച്ചയായി വിക്ഷേപിക്കുകയും പിന്നീട് അവ അന്തരീക്ഷത്തിലേക്ക് തിരിച്ചിറങ്ങുകയും ചെയ്യുന്ന സാഹചര്യത്തിൽ, അവയിൽ നിന്നുള്ള അവശിഷ്ടങ്ങൾ ഭൂമിയിലെ ജീവജാലങ്ങളെ ബാധിക്കുമോ എന്ന ആശങ്ക ശക്തമാകുകയാണ്.
ഇതുമായി ബന്ധപ്പെട്ട് കാനഡയിൽ നടത്തിയ പുതിയ പഠനം ഗൗരവകരമായ കണ്ടെത്തലുകളാണ് മുന്നോട്ടുവയ്ക്കുന്നത്. University of British Columbiaയിലെ ഗവേഷകനായ ഇവാൻ റൈറ്റ് നയിച്ച സംഘമാണ് ഈ പഠനം നടത്തിയത്.
11 വ്യത്യസ്ത സാറ്റലൈറ്റ് മെഗാ-കോൺസ്റ്റെലേഷനുകളിലായി ആകെ 73,369 കൃത്രിമോപഗ്രഹങ്ങൾ അന്തരീക്ഷത്തിലേക്ക് മടങ്ങിവരുമ്പോൾ എന്തെല്ലാം സംഭവിക്കാമെന്നതാണ് പഠനത്തിൽ വിലയിരുത്തിയത്.
ഉപഗ്രഹങ്ങൾ പൂർണമായും കത്തി നശിക്കാതെ അവശിഷ്ടങ്ങൾ ഭൂമിയിൽ പതിച്ചാൽ, ഭൂമിയിലെ ജീവജാലങ്ങൾക്ക് പരിക്കോ മരണവുമുണ്ടാകാനുള്ള സാധ്യത 40 ശതമാനം വരെ ഉയരാമെന്നാണ് പഠനം ചൂണ്ടിക്കാണിക്കുന്നത്.
ലോകം വലിയ തോതിൽ ഉപഗ്രഹങ്ങൾ വിക്ഷേപിക്കുന്ന സാഹചര്യത്തിൽ, ഓരോ ഉപഗ്രഹത്തിൽ നിന്നും ചെറിയ ഭാഗം പോലും അവശേഷിച്ചാൽ ഭൂമിയിലെ മനുഷ്യർക്കും അടിസ്ഥാന സൗകര്യങ്ങൾക്കും അപകടസാധ്യത ഗണ്യമായി ഉയരുമെന്നും ഗവേഷകർ മുന്നറിയിപ്പ് നൽകി.
അലുമിനിയം പോലുള്ള കുറഞ്ഞ മെൽറ്റിംഗ് പോയിന്റുള്ള വസ്തുക്കൾ അന്തരീക്ഷത്തിലേക്ക് പ്രവേശിക്കുമ്പോൾ പൂർണമായും കത്തിപ്പോകാൻ കൂടുതൽ സാധ്യതയുള്ളതാണ്.
എന്നാൽ സ്റ്റെയിൻലെസ് സ്റ്റീൽ, ടൈറ്റാനിയം, ടംഗ്സ്റ്റൺ, ബെറിലിയം, സിലിക്കൺ കാർബൈഡ് തുടങ്ങിയ വസ്തുക്കൾ പൂർണമായി നശിക്കാതെ ശേഷിക്കാമെന്നും പഠനം വ്യക്തമാക്കുന്നു.
ഇത്തരം വസ്തുക്കൾ സാധാരണയായി ഇന്ധന ടാങ്കുകളിലും റിയാക്ഷൻ വീലുകളിലും ഉപയോഗിക്കുന്നവയാണ്.
ഉപഗ്രഹങ്ങൾ അതിവേഗത്തിൽ അന്തരീക്ഷത്തിലേക്ക് പ്രവേശിക്കുമ്പോൾ എയറോഡൈനാമിക് സമ്മർദ്ദം അവയെ തകർക്കുകയും, ഉയർന്ന താപനില അവയെ ചെറിയ കണങ്ങളാക്കി മാറ്റുകയും ചെയ്യുമെങ്കിലും, വലിയ ഉപഗ്രഹങ്ങൾ ചില സാഹചര്യങ്ങളിൽ പൂർണമായി കത്തിപ്പോകാതെ ശേഷിക്കാമെന്ന് ഗവേഷകർ മുന്നറിയിപ്പ് നൽകുന്നു.
നിലവിലുള്ള സുരക്ഷാ മാനദണ്ഡങ്ങൾ ഓരോ ഉപഗ്രഹത്തെയും വേർതിരിച്ചാണ് വിലയിരുത്തുന്നത്.
എന്നാൽ ആയിരക്കണക്കിന് ഉപഗ്രഹങ്ങൾ ചേർന്ന് സൃഷ്ടിക്കുന്ന അവശിഷ്ടങ്ങളുടെ സംയുക്ത പ്രത്യാഘാതം ഇതുവരെ ഗൗരവമായി പരിശോധിച്ചിട്ടില്ലെന്നും പഠനം ചൂണ്ടിക്കാണിക്കുന്നു.
ഇത്തരം അവശിഷ്ടങ്ങളെ നിയന്ത്രിതമായി നിശ്ചിത മേഖലകളിലേക്ക് തിരിച്ചിറക്കാൻ കഴിയാതിരുന്നാൽ, യാദൃച്ഛിക പ്രദേശങ്ങളിൽ പതിച്ച് മനുഷ്യജീവിതത്തിനും അടിസ്ഥാന സൗകര്യങ്ങൾക്കും വിമാന ഗതാഗതത്തിനും വരെ ഭീഷണിയാകാൻ സാധ്യതയുണ്ടെന്നും ഗവേഷകർ വ്യക്തമാക്കി.
അതേസമയം, ഉപഗ്രഹ നിർമ്മാതാക്കൾ പൂർണമായ അബ്ലേഷൻ (സമ്പൂർണ കത്തിത്തീർച്ച) ലക്ഷ്യമിടുന്നുണ്ടെങ്കിലും, അത് യഥാർത്ഥത്തിൽ എത്രത്തോളം സാധ്യമാകുമെന്നതിൽ വലിയ അനിശ്ചിതത്വം തുടരുന്നതായും ഇവാൻ റൈറ്റും സംഘവും മുന്നറിയിപ്പ് നൽകി. ഒരു ഉപഗ്രഹം പൂർണമായും കത്തിത്തീർന്നില്ലെങ്കിൽ, അത് ഗൗരവമായ അപകടസാധ്യതയായി മാറുമെന്നും പഠനം ചൂണ്ടിക്കാട്ടുന്നു.
English Summary
Rapid growth of satellite megaconstellations in low Earth orbit is raising serious safety concerns. A new study led by researcher Evan Wright from the University of British Columbia warns that debris from decommissioned satellites—especially from large constellations such as SpaceX’s Starlink—could pose significant risks to people, infrastructure and aviation. The study estimates that if satellite fragments survive atmospheric re-entry, the risk of injury or death to living beings could be as high as 40 percent, highlighting the uncertainty surrounding complete burn-up of modern satellites.
leo-satellite-megaconstellation-debris-risk-spacex-starlink-study
low earth orbit, satellite megaconstellations, SpaceX, Starlink, satellite debris, University of British Columbia, Evan Wright, space safety, atmospheric re-entry, aerospace research
