വിമാനം ട്രക്കില് ഇടിച്ചു; നിരവധി പേര്ക്ക് പരിക്ക്, 4 പേരുടെ നില ഗുരുതരം
ന്യൂയോര്ക്ക്: ലാഗ്വാര്ഡിയ വിമാനത്താവളത്തില് എയര് കാനഡ വിമാനവും അഗ്നിശമന സേനയുടെ ട്രക്കും കൂട്ടിയിടിച്ചുണ്ടായ അപകടത്തില് നിരവധി പേര്ക്ക് പരിക്കേറ്റു. നാലുപേരുടെ നില ഗുരുതരമാണെന്ന് റിപ്പോര്ട്ട്.
ന്യൂയോര്ക്കിലെ ലാഗ്വാര്ഡിയ വിമാനത്താവളത്തില് എയര് കാനഡയുടെ യാത്രാവിമാനം അഗ്നിശമന സേനയുടെ ട്രക്കില് ഇടിച്ചുണ്ടായ അപകടം വലിയ ആശങ്കയുണ്ടാക്കി. മോണ്ട്രിയലില് നിന്ന് എത്തിയ എയര് കാനഡ എക്സ്പ്രസ് CRJ-900 വിമാനമാണ് അപകടത്തില്പ്പെട്ടത്.
വിമാനത്തിന്റെ മുന്ഭാഗം ട്രക്കില് ഇടിച്ചതായാണ് പ്രാഥമിക വിവരം. അപകടത്തില് നിരവധി പേര്ക്ക് പരിക്കേറ്റതായി റിപ്പോര്ട്ടുകള് സൂചിപ്പിക്കുന്നു. ഇതില് നാലുപേരുടെ നില ഗുരുതരമാണെന്നും വിവരം. ട്രക്കിലുണ്ടായിരുന്ന അഗ്നിശമന സേനാംഗങ്ങള്ക്കും പരിക്കേറ്റിട്ടുണ്ട്.
അപകടസമയത്ത് വിമാനത്തില് ഏകദേശം നൂറോളം യാത്രക്കാരുണ്ടായിരുന്നുവെന്നാണ് സൂചന. സംഭവത്തെ തുടര്ന്ന് വിമാനത്താവളത്തില് രക്ഷാപ്രവര്ത്തനം ശക്തമായി തുടരുകയാണ്. അഗ്നിശമന സേനയുടെ നാല് യൂണിറ്റുകള് സ്ഥലത്തെത്തി രക്ഷാപ്രവര്ത്തനം ഏകോപിപ്പിച്ചു.
അപകടത്തെ തുടര്ന്ന് യു.എസ് ഫെഡറല് ഏവിയേഷന് അഡ്മിനിസ്ട്രേഷന് (FAA) ലാഗ്വാര്ഡിയ വിമാനത്താവളത്തില് നിന്ന് പുറപ്പെടുന്ന വിമാനങ്ങള്ക്ക് താല്ക്കാലിക ‘ഗ്രൗണ്ട് സ്റ്റോപ്പ്’ നിര്ദേശം പുറപ്പെടുവിച്ചു. അടിയന്തര സാഹചര്യം കണക്കിലെടുത്താണ് നടപടി. പ്രാദേശിക സമയം വൈകുന്നേരം ആറുവരെ വിമാനങ്ങള്ക്ക് പറന്നുയരാന് അനുമതി നിഷേധിച്ചതായും റിപ്പോര്ട്ടുണ്ട്.
മണിക്കൂറില് ഏകദേശം 39 കിലോമീറ്റര് വേഗതയില് സഞ്ചരിക്കുമ്പോഴാണ് വിമാനം ട്രക്കില് ഇടിച്ചതെന്നാണ് വിവരം. ഇതോടെ ലാഗ്വാര്ഡിയയില് ഇറങ്ങേണ്ടിയിരുന്ന ചില വിമാനങ്ങള് മറ്റ് വിമാനത്താവളങ്ങളിലേക്ക് തിരിച്ചുവിടുകയോ പുറപ്പെട്ട ഇടങ്ങളിലേക്ക് തന്നെ മടങ്ങുകയോ ചെയ്തു.
സംഭവത്തില് എയര് കാനഡയോ ഫെഡറല് ഏവിയേഷന് അധികൃതരോ ഇതുവരെ ഔദ്യോഗിക വിശദീകരണം നല്കിയിട്ടില്ല. അപകടത്തിന്റെ കാരണത്തെക്കുറിച്ചുള്ള അന്വേഷണം ആരംഭിക്കുമെന്ന് സൂചനയുണ്ട്.
English Summary
An Air Canada Express CRJ-900 aircraft collided with a fire truck at New York’s LaGuardia Airport, injuring several people, including four critically. Flights were temporarily halted as emergency response continues.
